અંબાજી અને દ્વારકા પહોંચી શકાશે મિનિટોમાં: એરપોર્ટ મળશે

 

 

- ગુજરાતમાં નવા ચાર એરપોર્ટ બનશે- અંબાજી, દ્વારકા, પાલિતાણા અને અંકલેશ્વરમાં બનશે એરપોર્ટ
- એરપોર્ટ સત્તાવાળાઓ તરફથી મંજૂરી મળી ગઇ


ગુજરાતના પ્રસિદ્ધ યાત્રાધામ એવા અંબાજી અને દ્વારકામાં નવા એરપોર્ટ માટે સંબંધિત સત્તાવાળાઓ તરફથી પ્રાથમિક તબક્કાની મંજૂરી મળી ગઇ છે અને 15મી ઓગસ્ટ પછી આ નવા સૂચિત એરપોર્ટ બનાવવા માટેના અભ્યાસ માટે એજન્સીને કામગીરી સોંપાઇ શકે તેમ છે.


ગુજરાતના મહત્વના યાત્રાધામોને હવાઇ માર્ગે જોડવા માટે દ્વારકા, અંબાજી, પાલિતાણા સહિત અંકલેશ્વર ખાતે નવા એરપોર્ટ બાંધવા માટેની દરખાસ્તને એરપોર્ટ ઓથોરિટી ઓફ ઇન્ડિયા, નવી દિલ્હી તરફથી પ્રાથમિક સ્તરે મંજૂરી મળી ગઇ હોવાનું સૂત્રો પાસેથી જાણવા મળી રહ્યું છે.


સૂત્રો પાસેથી મળતી માહિતી અનુસાર આ સ્થળોએ એરપોર્ટ બાંધવા માટેની જગ્યા અને સાનુકૂળતાઓની તપાસ માટે નાગરિક ઉડ્ડયન મંત્રાલય તરફથી કન્સલ્ટન્સી ફર્મની પસંદગી કરીને તેને કામગીરી સોંપવામાં આવશે.


નોંધનીય છે કે ગુજરાતના આ યાત્રાધામો ખાતે વિશાળ સંખ્યામાં શ્રદ્ધાળુઓ આવતા હોવાથી તેમની સુવિધા માટે અહીં એરપોર્ટ માટેની માંગણી છેલ્લા ઘણા સમયથી કરવામાં આવી રહી હતી.