નરેન્દ્ર મોદીની સાથે પાક. પણ કરે છે આ ગુજરાતીનું સન્માન!

 

 

વાત એક એવા ગુજરાતીની છે જેમની જન્મ શતાબ્દિની ઉજવણીમાં ગુજરાતના મુખ્યપ્રધાન નરેન્દ્ર મોદી ખાસ ઉપસ્થિત રહ્યા હતા એટલું જ નહીં પાકિસ્તાન સરકારે પણ તેમના માનમાં ખાસ ટપાલ ટિકિટ બહાર પાડી હતી. આ ગુજરાતી છે વહોરા સમુદાયના ધાર્મિક નેતા સૈયદના સાહેબ. સુરતમાં જન્મેલા અને મુંબઈમાં સ્થાયી થયેલા સૈયદના સાહેબને તેમના 100મા જન્મ દિવસની ઉજવણી ગુજરાતમાં કરવા નરેન્દ્ર મોદીએ આમંત્રણ પાઠવ્યું હતું, જ્યારે પડોશી દેશ પાકિસ્તાનની સરકારે તેમની જન્મ શતાબ્દિ નિમિત્તે ખાસ સ્ટેમ્પ બહાર પાડ્યો હતો.

સૈયદના સાહેબની જન્મ શતાબ્દિ નિમિત્તે પાકિસ્તાને પાંચ લાખ પોસ્ટલ સ્ટેમ્પ બહાર પાડ્યા હતા. આ સ્ટેમ્પ પર ઉત્તર નઝીમબાદ સ્થિત બાબ-એ-હાતિમિની તસવીર છાપવામાં આવી છે. મુંબઈ સ્થિત મ્યુઝિયમમાં આ સ્ટેમ્પ મકવામાં આવશે. વહોરા સમુદાયના લોકો કોઈપણ કિંમત ચૂકવીને આ ટિકિટ ખરીદવા માટે ઉત્સુક છે.

સૈયદના સાહેબનો જન્મ જ્યાં થયો હતો એ સુરતમાં પણ વહોરા સમુદાયે સૈયદના સાહેબના માનમાં ખાસ ટપાલ ટિકિટ બહાર પાડવા ભારત સરકારને અપીલ કરવાનો નિર્ણય કર્યો છે. સૈયદના સાહેબનો જન્મ સુરતમાં થયો હોવાથી તથા તેઓ ભારતીય નાગરિક હોવાથી સરકારે પણ પાકિસ્તાનની જેમ તેમના માનમાં ટિકિટ બહાર પાડવી જોઈએ. વહોરા સમાજ ટૂંક સમયમાં આ અંગે ભારત સરકારને અપીલ કરશે.