કમરનો દુખાવો છે? આ રહ્યાં કેટલાક ઘરગથ્થુ ઉપાયો

કમરના દુખાવામાં હરવા-ફરવાનું, બેસવાનું, વાંકા વળવાનું મુશ્કેલ બની જાય છે. આ દુખાવામાંથી રાહત મેળવવા માટે પહેલાં તેના કારણો જાણીશું, પછી તેનાથી છુટકારો મેળવવાના ઉપાયો જાણીશું.

કમરનો દુખાવો શા માટે થાય છે?

આપણી નાની નાની ટેવ કમરના દુખાવા માટે કારણભૂત બને છે. જેમ કે, વધારે કામ કરવું, બેસવા-ઊઠવામાં પોશ્વરનો ખ્યાલ ન રાખવો, વધારે વજન ઊંચકવું વગેરે. સ્ત્રીઓમાં શ્વેતપ્રદર અને માસિક સ્રાવમાં ગરબડને લીધે પણ કમરનો દુખાવો થાય છે. આ દુખાવો દૂર કરવાના કેટલાક સરળ અને સફળ ઘરગથ્થુ ઉપાયો વિશે જાણીએ...

- ૩૦ ગ્રામ કપૂર અને ૨૦૦ ગ્રામ સરસિયાને ભેળવી કાચની એક બોટલમાં ભરી લઇ ૧૫-૨૦ મિનિટ માટે તડકામાં મૂકી રાખો. આનાથી નિયમિત રીતે માલશિ કરો. 

- ૨૦ ગ્રામ ગરમ પાણીમાં અડધો ચમચો સિંધાલૂણ ભેળવી તેમાં કપડું પલાળો. આ કપડાથી કમરને શેક કરવાથી રાહત રહેશે.

- રાતે એક ગ્લાસ ગરમ દૂધમાં પા ચમચી સૂંઠ અને હળદર ભેળવી સૂતાં પહેલાં નિયમિત રીતે પીવાનું રાખો.

- રોજ સવારે નરણાં કોઠે અખરોટના ૩-૪ ટુકડા ખૂબ ચાવીને ખાવ. 

- ૧૦ સાકર અને થોડી ખસખસ ક્રશ કરો. આ પાઉડર રોજ રાતે દૂધ સાથે લેવાનું રાખો.

- સિંધાલૂણ, સૂંઠ અને મરી સરખા ભાગે લઇ ક્રશ કરો. રોજ ૧ ચમચી દૂધ સાથે લો.

- સૂંઠ અને અશ્વગંધાનું ચૂર્ણ સરખા ભાગે મિકસ કરી હળવો નાસ્તો કર્યા પછી અડધી ચમચી લો. કમરના દુખાવા માટે આ શ્રેષ્ઠ ઔષધિ છે.

- બાવળના ગુંદરનો પાઉડર બનાવી દૂધ સાથે અડધી ચમચી લેવાથી રાહત થશે.