ઘરે બનાવો ચટપટી હાઇજેનિક 'પાણીપૂરી'

પાણીપૂરી એ નાના મોટા સૌને ભાવતી વસ્તુ છે. આવામાં જો બહાર લારી પર મળતી પાણીપૂરી ખાશો તો સ્વાસ્થ્યને ખતરો પેદા થઈ શકે છે. સમાચારોમાં પણ તમે વાંચ્યુ જ હશે કે પાણીપૂરી વાળા ભૈયા પાણીપૂરી બનાવતી વખતે કે વેચતી વખતે જરાય પણ સ્વચ્છતા નથી રાખતા.

જો તમે પણ પાણીપૂરીના શોખીન હોવ તો ઘરે જ બનાવો ચટપટી પાણીપૂરી

સામગ્રી:

પૂરી માટે:

1 કપ રવો/સુજી
3 ટેબલસ્પૂન ઝીણો મેંદો
1/4 ટીસ્પૂન બેકિંગ સોડા
તળવા માટે તેલ

પાણી માટે:

1 કપ લીલા ધાણા
1 કપ ફૂદીનો ઝીણો સમારેલો
3 લીલા મરચાં
1 ટેબલસ્પૂન સંચળ
2 લીંબુ
1 ટેબલસ્પૂન મીઠું
જરૂર પ્રમાણે પાણી
(તમે ઈચ્છો તો પાણીમાં ખારી બુંદી પણ ભેળવી શકો છો)


મસાલા માટે:

3 બાફેલા બટાટા
1 કપ બાફેલા ચણા
3 લીલા મરચાં પીસેલા
2 ટીસ્પૂન મીઠું
1 ટીસ્પૂન સંચળ (તમે ઈચ્છો તો મસાલામાં તમે બાફેલા મગ અને ડુંગળી પણ લઈ શકો છો)

રીત: પૂરી: - મેંદો અને રવો મિક્સ કરો. તેમાં બેકિંગ સોડા ઉમેરીને નરમ કણક બાંધો. - કણકમાંથી નાની અને પાતળી પૂરીઓ વણો અને તેલમાં તળી લો.


પાણી: - લીલા મરચાં, લીલા ધાણા, ફૂદિનો, મીઠું અને સંચળ મિક્સ કરીને પીસી લો. તેમાં જરૂર અનુસાર લીંબુનો રસ ભેળવો. - આ મિશ્રણમાં પાણી મિક્સ કરીને બાજુ પર મૂકી દો જેથી તેમાં ફૂદિનાનો સ્વાદ બેસી જાય.


મસાલો: - બાફેલા બટાટાને સ્મેસ કરી લો. - તેમાં બાફેલા ચણા મિક્સ કરો. તેમાં બાકીની સામગ્રી ઉમેરીને બરાબર મિક્સ કરી લો.


પૂરીમાં બટાટા-ચણાનો મસાલો ભરીને ફૂદિના પાણી સાથે સ્વાદ માણો. અન્ય ફ્લેવરના પાણી સાથે પણ તમે પાણીપૂરી ખાઈ શકો જેમ કે લસણ, જીરુ, આંબલી,ટમેટા,આદુ વગેરે.