તંદુરસ્ત રહેવાનો એક માત્ર અક્સીર મંત્ર છે 'પાણી'

 

 

પાણીનું મહત્વ આપણે સૌ જાણીએ જ છીએ અને પાણી વગરનું જીવન કલ્પી શકતાં જ નથી. શરીરના દરેક અવયવોને સક્રિય રાખવા પાણી લેવું જ પડે છે. ઉનાળામાં ગરમીને કારણે ખૂબ જ પરસેવો થાય છે. આ પરસેવા દ્વારા આપણા શરીરમાં પાણી ઓછું થઇ જાય છે માટે પાણીની જરૂરિયાત વધી જાય છે.

*લોહીમાં રહેલું પાણી શરીરના દરેક સેલને ઓક્સિજન અને જરૂરી પોષક તત્વો પહોંચાડવાનું કામ કરે છે.
*શરીરના ટોક્સિનને દૂર રાખવામાં મદદરૂપ થાય છે.
*બોડી ટેમ્પરેચર જાળવી રાખે છે.
*મસલ્સ અને હાડકાંના સાંધાને લુબ્રિકેટેડ રાખે છે.
*શરીરમાં પ્રવેશેલા વાઇરસ અને રોગના જર્મ્સને શરીર બહાર કાઢી બીમાર પડતાં અટકાવે છે.
*એનર્જી લેવલને જાળવી રાખી થાક લાગવા દેતું નથી.
પાણી પીવું મહત્વનું છે. પાણીનું તાપમાન એટલું મહત્વનું નથી. ઘણી વાર આપણે વિચારીએ છીએ કે જો ગરમ પાણી પીશું તો જલદીથી વજન ઊતરશે. ગરમ પાણી ભાવતું ન હોવાથી પૂરતું પાણી પીવાતું નથી. માટે બરફનું, ફ્રજિનું કે માટલાનું પાણી પણ વધારે પીઓ. ગરમીમાં બહાર નીકળો ત્યારે પાણીની બોટલ સાથે જ રાખો.
*ઉનાળા દરમિયાન ખોરાક એવો ખાવ જે પાણીથી ભરપૂર હોય. જેમ કે, સંતરા, તરબૂચ, કોબીજ, કાકડી પાણીથી ભરપૂર છે.
*વધુ પડતાં ઠંડાં પીણાં ના પીતાં ફળફળાદિ લેવાનું રાખો. ફુદીનાનો જયુસ, નાળિયેર પાણી, વરિયાળીનું પાણી વગેરે શરીરમાં ઠંડક કરી ડીહાઇડ્રેશન થતું અટકાવે છે. વધુ પડતાં ખાંડવાળાં પીણાંને બદલે છાશ, લીંબુપાણી પીવાનું રાખો.
*રમતગમતમાં અથવા ઘરની બહાર જતાં પહેલાં એક ગ્લાસ પાણી પીને નીકળો. જમવાના અડધા કલાક પહેલાં એક ગ્લાસ પાણી પીઓ. જ્યારે પણ પાણી પીઓ ત્યારે બે ગ્લાસ સાથે પીઓ.
*આમ કરવાથી ગરમી પણ ઓછી લાગશે અને ગરમીથી થતા રોગોથી દૂર રહેવાશે.

જો તમે શરીરને જોઇતા પ્રમાણમાં પાણી ન પીઓ તો તમારા શરીરમાં ફેટની જમાવટ થઇ શકે છે. મસલ્સ નબળા પડી શકે છે, આંતરડાં નબળાં પડી કબજિયાત જેવા રોગો ઘર કરી શકે છે. પાણી વગર શરીરમાં ઝેર ફેલાઇ શકે છે. જ્યારે કિડની યુરિક એસિડ અને યુરિયા છુટું પાડે છે. ત્યારે તેને પાણીમાં ઓગાળવાની જરૂર પડે છે.

જો પૂરતું પાણી પીવામાં ન આવે અને આ કચરો જો ન નીકળે તો પથરી થઇ શકે છે. સવારે ઊઠો ત્યારે ૨ ગ્લાસ પાણી પીઓ. વચ્ચે જ્યારે તરસ લાગે અથવા યાદ આવે તો એક ના બદલે બે ગ્લાસ પાણી પીઓ. રાત્રે સૂતા પહેલાં ૨ ગ્લાસ પાણી પીઓ. પાણી તંદુરસ્ત રાખશે અને ઘણાખરા રોગોથી દૂર રાખશે. વજન પણ ઓછું કરશે.