ખાસ સોફ્ટવેર તૈયાર થશે, દુનિયામાં ગમે ત્યાં કરો મફત SMS

 

સબીર ભાટિયા અને યોગેશ પટેલ સ્થાપિત જેએએકસટીઆર ઈન્ક.એ દુનિયામાં ગમે તેને મફત એસએમએસ મોકલવા માટે જેએએકસટીઆરએસએમએસ નામે ક્રોસ- પ્લેટફોર્મ, મુકત ટેકિસ્ટંગ એપ્લિકેશન રજૂ કર્યાની મંગળવારે મુંબઈમાં જાહેરાત કરી હતી. અગાઉ તેમણે હોટમેલ ડોટ કોમ આપ્યું હતું.

નવા રજૂ કરાયેલા એપ્લિકેશનની ખૂબી એ છે કે મોબાઈલ ઉપભોકતા દુનિયામાં અન્ય કોઈના પણ મોબાઈલ ફોન પર ટેકસ્ટ એસએમએસ મોકલી શકે છે, જે માટે એસએમએસ પ્રાપ્ત કરનારના ફોન પર કથિત એપ્લિકેશન ઈન્સ્ટોલ ન કરાયું હોય તો પણ ચાલી શકે છે.

સબીર ભાટિયાએ જણાવ્યું હતું કે ૧૫ વર્ષ પૂર્વે અમે તમને હોટમેલ ડોટ કોમ આપ્યું. દુનિયામાં આ પ્રથમ એવી વેબમેઈલ સેવા છે જેણે ઈમેઈલને ડેસ્કટોપના બંધનમાંથી મુકિત અપાવી હતી અને ઉપભોકતાઓ માટે પૂર્ણપણે મુકત અને મફત વૈશ્વિક સંપર્ક નેટવર્ક નિર્માણ કરવામાં મદદ કરી હતી.

આજે અમે આ નવું એપ્લિકેશન લાવ્યા છીએ જે હોટમેઈલે ઈમેઈલ માટે કર્યું તે એસએમએસ માટે કરશે.

આ એપ્લિકેશનમાં ઉપભોકતાનો નંબર રાખવામાં આવે છે અને તે સેવા માટે સાઈન- અપ કરવા નવા નંબરની જરૂરત નથી હોતી.

આ એપ્લિકેશન તેની વેબસાઈટ પર અથવા એપ દુકાનમાંથી હેન્ડસેટ પર સહજતાથી અને મફત ડાઉનલોડ કરી શકાય છે અને આઈફોન, બ્લેકબેરી, એન્ડ્રોઈડ અને જેટુએમઈ સહિત સર્વ મોબાઈલ ઓપરેટિંગ પ્રણાલી માટે ચાલી શકે છે, એમ આ બંનેએ મંગળવારે મુંબઈમાં આ અંગેની જાહેરાત કરતાં જણાવ્યું હતું.