સલાહનું મહત્વ કઇ રીતે થાય છે નક્કી

 

 

લોકો સલાહકાર હોય છે, પણ સલાહનું મહત્વ કઇ રીતે નક્કી થાય છે, તે પણ જોવું જોઇએ.

સૂચના, સલાહ, વાત એની માનવામાં આવે છે, જેનો અનુભવ બીજાથી વધારે હોય. પહેલાં આવું જ હતું. આ જ એક આધાર હતો. હવે ધીરે ધીરે વયની મર્યાદા તેનો વિસ્તાર વધારતી જાય છે. કેટલીક વાર તો નાના મોઢે પણ સમજદારીપૂર્વકની સલાહ સાંભળવા મળી જાય છે.

તો શું એ નાનકડું બાળક સલાહકાર બની ગયું? વકતા ક્યારેય સલાહકાર નથી હોતો. શ્રોતા હોય, સાંભળે અને સમજે, તો કહેનારું કંઇ મહત્વ પણ ગણાય. જ્યાં સુધી કોઇ સલાહ માને નહીં, ત્યાં સુધી તે એક સામાન્ય વાત જ છે. તમે કહો અને કોઇ માની લે, તો તે સલાહ છે. સલાહ આપવાથી જ સલાહકાર નથી બનાતું. તેનું અસ્તિત્વ સલાહ માનનારની સાથે જોડાયેલું છે.

સલાહ આપવી અને સૂચના કરવી એ બંનેમાં ફરક છે. સૂચના જાણ્યા વિના, કોઇની સ્થિતિને સમજયા વિના આપી શકાય છે.જોકે સલાહ આપનાર દરેક વાતને સારી રીતે સમજીવિચારીને પોતાની વાત કહે છે. સલાહકારનો એક હોદ્દો પણ હોય છે, જેમાં સલાહ આદેશાત્મક નથી હોતી. તેમાં ન માનવાની છુટ હોય છે. જ્યારે કોઇ કહે કે જુઓ, આ એક સલાહ છે, તો તેનો કહેવાનો અર્થ એવો થાય કે, મારી દ્રષ્ટિએ આમાં તમારું હિત સમાયેલું છે.