શીખો, વિડિયોનું ઓટોમેટેડ એડિટિંગ

 

તમે શૂટ કરેલા વિડિયોઝને કોઇ ભારેખમ સોફટવેરની મદદ વિના જાતે જ એડિટ કરવા છે?

એ જમાનો યાદ છે? જયારે લગ્ન કે રિસેપ્શનમાં પેલા વિડિયોગ્રાફર ભારેભરખમ વિડિયો કેમેરા ખભે ઊચકીને પ્રસંગની વિડિયોગ્રાફી કરતા? મુખ્ય પ્રસંગના પાછા અલગ અલગ પેટાપ્રસંગો હોય અને એ દરેક વખતે વિડિયોગ્રાફર એમના પથારા સાથે હાજર હોય. મંડપમુહૂર્ત જેવો પેટાપ્રસંગ ઘરમાં જ ઉજવવાનો હોય ને ઘર નાનું હોય તો વિડિયોગ્રાફરને એમના મસમોટા કેમેરા સાથે સમાવવા માટે મહેમાનોને પણ બહાર રાખવા પડે!

પછી એ દરેક પ્રસંગનું એડિટિંગ થાય, તમને એડિટિંગમાં રસ હોય અને વિડિયોગ્રાફર સારો હોય તો એ તમને બતાવે. તમે એમાં સુધારાવધારા સૂચવો, તમે એકદમ ચૂઝી હો તો બેકગ્રાઉન્ડમાં મૂકવાનાં ગીતોનું લિસ્ટ પણ બનાવો ને છેવટે કેટલાય દિવસો પછી, પેલી બિલકુલ ખોવાઈ ગયેલી વીએચએસ વિડિયો કેસેટરૂપે આખો વિડિયો તમારા હાથમાં આવે અને સગાંસ્નેહીઓને બોલાવીને, મોટા ભાગે ભાડે મંગાવેલા વીસીઆર (ટાઇપરાઇટરની જેમ, પણ એના કરતાં ઘણી વધુ ઝડપથી ગૂમ થઈ ગયેલું વધુ એક સાધન!) પર વિડિયો જોવામાં આવે!
હવે સમય બિલકુલ બદલાઈ ગયો છે. કેમેરા તદ્દન સ્લિક થઈ ગયા છે, ત્યાં સુધી કે મેઇડ ઇન ચાઇના રિસ્ટવોચમાં પણ ચાર-ચાર જીબીની કેપેસિટીના વિડિયો કેમેરા આવી ગયા છે. પરિણામે વિડિયો શૂટિંગમાં હવે કોઈ ઝંઝટ રહી નથી. જસ્ટ એઇમ એન્ટ સ્ટાર્ટ શૂટિંગ! બધું ડિજિટલ ફોર્મમાં હોવાથી શૂટિંગનું પરિણામ જોવા માટે પણ જરાય રાહ જોવી પડતી નથી. વાયર્સ આમતેમ કનેકટ કર્યા અને મોટા સ્ક્રીન પર વિડિયો ચાલુ! બધું એટલું સહેલું બની ગયું છે કે આખી વાતમાં પહેલાં જેવો ઉત્સાહ રહ્યો નથી. તમે જ તપાસી જોજો, તમે જેટલા ફોટોગ્રાફ લો છો કે વિડિયો શૂટ કરો છો, એમાંથી કેટલા ખરેખરા ઉત્સાહથી ફરી ફરી જુઓ છો?
છતાં, જો તમારો ઉત્સાહ ટકી રહ્યો હોય તો સૌથી મોટી વિડિયો એડિટિંગની સમસ્યા હજી લગભગ પહેલાં જેટલી જ મોટી છે. આપણે પ્રોફેશનલ વિડિયોગ્રાફર તો છીએ નહીં કે બધી રીતે યોગ્ય શૂટિંગ કરી શકીએ. ઉપરાંત, બીજા લોકો પણ આપણા વિડિયો શૂટિંગને સિરિયસલી લેતા ન હોય એટલે ચાલુ શૂટિંગે વરચે કોઈનો વાંસો આડો આવી જાય કે કોઈ આપણી સાથે વાત કરવા લાગે ને આપણું ઘ્યાન શૂટિંગમાં રહે નહીં. કયારેક આપણે પણ વરચે વરચે કટ કરીને કટકે કટકે વિડિયો શૂટિંગ કરીએ.
વરચે આવતાં આવાં કામ વગરનાં શોટ્સ કે બ્રેકસ દૂર કરવા હોય તો શું કરવું? કે પછી એક જ વિષયની જુદી જુદી કિલપ્સ બની હોય એને ભેગી કેવી રીતે કરવી? પ્રોફેશનલ્સ માટે તો એ માટેનાં સરસ સોફટવેર અને ટૂલ્સ હોય છે, પણ આપણને એવી બધી સગવડ ન હોય તો?
તો એનો ઉપાય છે મેજિસ્ટો.