સુરતને મળશે ૧૭ નવા બ્રિજની ભેટ

 

આજે પાલિકાનું આગામી વર્ષનું ડ્રાફ્ટ બજેટ રજુ કરાશે

ચાલુ વર્ષે વિકાસકામો પાછળ ૧૩૪૫ કરોડમાંથી ફકત ૩૪૫ કરોડ જ ખર્ચી શકાયા

બજેટનું કદ રૂ.૩ હજાર કરોડની જેટલું રખાશે

૧૭થી વધુ બ્રિજ, ઓવરબ્રિજની જોગવાઈ

પાલિકાના તંત્રે આગામી વર્ષ માટેનું ડ્રાફ્ટ બજેટની દરખાસ્ત તૈયાર કરી દીધી છે. માત્ર ફાયનલ ટચ આપીને બુધવારે સવારે તેની જાહેરાત કરાશે. જોકે,ચાલુ વર્ષે રૂપિયા ખર્ચવામાં પનો ટૂંકો પડ્યો હોઈ આગામી બજેટમાં વિકાસકામો પાછળ(કેપિટલ ખર્ચ) છુટ્ટાહાથે જોગવાઈ કરવાનો પ્રયાસ કરાયો છે, તેમાં પણ બ્રિજ-ફ્લાયઓવર પાછળ મહત્તમ રૂપિયા ફાળવાય તેવો વર્તુળોએ સંકેત આપ્યો છે. એટલે, બુધવારે જાહેર થનારા ત્રણેક હજાર કરોડનું કદ ધરાવતા બજેટના મુસદ્દામાં બ્રિજ, ફ્લાયઓવર્સ અને બ્યુટિફિકેશનના પ્રોજેક્ટસની ભરમાર હશે.

નવા ૧૭ જેટલા બ્રિજ-ઓવરબ્રિજ હશે

હાલમાં ૩૪૫ કરોડના જે કામ થયાં છે. તેમાં બ્રિજના કામો મુખ્ય રહ્યાં છે. એટલે, હવે આગામી વર્ષના આયોજનમાં પણ ખર્ચ કરવા માટે બ્રિજ વિભાગ જ મહત્વનું માધ્યમ બને તેમ છે. પાલિકાના વર્તુળોનું કહેવું છે કે, સૌથી વધુ બ્રિજ અને ઓવરબ્રિજ માટેની જોગવાઈ પણ આ વખતના બજેટમાં હશે. આગામી વર્ષમાં ૧૭ જેટલાં બ્રિજ-ઓવરબ્રિજ બનાવવા માટેની જોગવાઈ કરાશે.

નવા ડ્રાફ્ટ બજેટનું કદ ત્રણ હજાર કરોડની નજીક

ચાલુ વર્ષની જોગવાઈઓ જ ૭૫ ટકા જેટલી બાકી રહી ગઈ છે, ત્યારે આગામી બજેટમાં સિટી બાયપાસ એક્સપ્રેસ-વે, બ્રિજ સાથેનો રબર બલૂન પ્રોજેક્ટ જેવા બે-ત્રણ મસમોટા પ્રોજેક્ટ હશે. બજેટનું કદ ૩ હજાર કરોડની આસપાસ રહેશે.

મેયર પણ ચોકબજાર પાસે ટ્રાફિકમાં અટવાયા!

દરરોજ સાંજે અને સવારે પીક અવર્સમાં ચોકબજારથી હોડી બંગલા સુધી ચક્કાજામ સર્જાય છે, તેમાં સામાન્ય લોકો તો રોજ ફસાય છે પણ મંગળવારે મેયર પણ ભેરવાયા હતાં. સાંજે મેયર રાજેન્દ્ર દેસાઈ સવા પાંચ વાગ્યાની આસપાસ ચોકબજારથી મુગલસરાઈ ખાતે આવતાં હતાં ત્યારે જ ભારે ચક્કાજામ સર્જાયો હતો. વીસેક મિનિટ સુધી મેયરની કાર ટ્રાફિકમાં ફસાઈ હતી. એક જ જગ્યાએ કાર ફસાઈ જતાં મેયર અકળાયા હતાં. એટલે, તેમણે કારની સાયરન ચાલુ કરાવીને રસ્તો િકલયર કરાવ્યો હતો. જોકે, પાલિકામાં આવીને તેમણે અધિકારીઓને આ વિસ્તારમાં થતાં કાયમી ચક્કા જામને અટકાવવા માટે વિકલ્પ શોધવા માટેની મૌખિક સુચના આપી હતી.