શેઇમ... શેઇમ... સુરત, આ જોઇને જાપાનીઓ થયા નિરાશ

દિલ્હીથી મુંબઈ વચ્ચેની હાઇસ્પીડ ટ્રેનની શક્યતા ચકાસવા જાપાનથી ટેક્નિકલ ટીમ સર્વે કરવા આવી હતી, રોજ બપોરે ૧થી ૩ ઓફિસ નધિયાણતી છોડીને જતા રહેતા સ્ટેશન મેનેજર જાપાનીઓને પ્રભાવિત કરવા ખડેપગે સતત ફરજ પર હાજર રહ્યા, જાપાનીઓની ટકોર બાદ સફાઇ કર્મચારીઓને દોડાવ્યા

દિલ્હીથી મુંબઈ વચ્ચે હાઇસ્પીડ ટ્રેન દોડાવવાના પશ્ચિમ રેલવેના અતિમહત્વાકાંક્ષી પ્રોજેક્ટની શક્યતાઓ ચકાસવા માટે શનિવારે બપોરે ૨.૦૦ વાગ્યે જાપાનની ટેક્નિકલ ટીમ સુરત સ્ટેશનની મુલાકાતે આવી હતી, જે સ્ટેશન પરની સુવિધાઓ તેમજ મુંબઇના ટ્રેકની ક્ષમતાનો સરવે કરવા માગતી હતી. જોકે, જાપાનીઓ સુરત સ્ટેશન પર ફેલાયેલી ગંદકી જોઈ નિરાશ થયા હતા. સુરક્ષા સંબંધે પણ જાપાનીઓએ શંકા વ્યક્ત કરતાં રેલવે સ્ટાફમાં દોડધામ મચી ગઈ હતી.

રોજ બપોરે ૧.૦૦થી ૩.૦૦ દરમિયાન ઓફિસને નધણિયાતી છોડીને ગાયબ રહેતા સુરત રેલવે સ્ટેશનના મેનેજર દીપક મટ્ટાઈ અને એઆરઓ એચ.ડી. મીણા જાપાનીઓની સેવામાં ખડેપગે ફરજ બજાવવા લાગી ગયા હતા. જાપાનીઓ અને સિનિયર અધિકારીઓને પ્રભાવિત કરવા આ બંને સ્થાનિક અધિકારીઓએ સફાઇ કોન્ટ્રાક્ટરને ખખડાવીને તાકીદે સફાઈ કરવા સૂચના આપી હતી. આમ, ફરી એકવાર માત્ર સાહેબોને ખુશ રાખવા જ રેલવે સ્ટાફ કામ કરતો હોવાનું સાબિત થયું હતું.

પ્રજાએ સહેવી પડતી દુવિધા અંગે રેલવેને કોઇ જ ચિંતા નથી. દરમિયાન સ્થિતિ જોઈ જાપાની પ્રતિનિધિમંડળ નિરાશ થયું હતું અને ખૂબ મોટા સુધારાની આવશ્યકતા અંગે ચિંતા વ્યક્ત કરી હોવાનું સૂત્રો પાસેથી જાણવા મળ્યું છે. પશ્ચિમ રેલવેના સીપીઆરઓ શરદ ચંદ્રયાને જણાવ્યું હતું કે દિલ્હીથી મુંબઈ વચ્ચે હાઇસ્પીડ ટ્રેન દોડાવવાનું પશ્ચિમ રેલવેનું આયોજન છે.

જાપાનમાં આવી જ હાઇસ્પીડ ટ્રેનો દોડે છે. તેથી આ યોજનાને સાકાર કરવા માટે જાપાનની ટેક્નિકલ ટીમની મદદ લેવાઈ છે. તેઓ હાલ સરવે કરી રહ્યા છે. દિલ્હી અને મુંબઈ વચ્ચે સુરત ખૂબ જ અગત્યનું સ્ટેશન છે. તેથી શનિવારે પાંચ સભ્યોનું જાપાની પ્રતિનિધિમંડળ સુરતની મુલાકાતે આવ્યું હતું. તેઓ રિપોર્ટ રજુ કરે ત્યાર બાદ જ તેમનો મત જાણી શકાશે અને તેને આધારે જરૂરી સુધારા-વધારા કરવામાં આવશે.