વડીલોને ઇન્ટરનેટ શીખવો બડે આરામ સે!

 

ડિજિટલ ડિવાઇડનું સૌથી મોટું ઉદાહરણ હોય તો તે છે આપણાં વડીલો અને ઘરના યુવાનો તથા બાળકો. યુવાનો અને બાળકો મોબાઇલ અને કમ્પ્યુટરમાં આખો વખત ખૂંપેલાં રહે છે, જ્યારે વડીલો એનાથી શક્ય તેટલું વધારે અંતર રાખે છે.

પરંતુ કમ્પ્યુટર અને ઇન્ટરનેટ સાથે દોસ્તી કરવી એ તેમને એક સારી પ્રવૃત્તિ તો આપે જ છે, સાથોસાથ જો તેમનાં સંતાનો વિદેશ કે બીજાં શહેરોમાં રહેતાં હોય, તો તેમની એકલતા પણ ભાંગે છે. પરંતુ એમની ઇન્ટરનેટ અને બેઝિક કમ્પ્યુટર સ્કિલ્સ સાથે દોસ્તી કરાવવી સહેલી નથી. જો કમ્પ્યુટર કલાસમાં જઇ શકાય તેમ ન હોય અથવા તો ઘરે બેસીને જાતે જ તે કામ કરવું હોય, તો કેટલીક સાઇટ્સ આ કામમાં ભારે મદદરૂપ થાય છે.

જેમ કે બીબીસીની ‘વેબવાઇઝ’ > (www.bbc.co.uk/webwise) એ ઇન્ટરનેટ સાથે દોસ્તી કરવાના સૌથી પહેલા પગથિયાની ગરજ સારે છે. આ ઉપરાંત તેમાં દરેક પોઇન્ટને સમજાવવા માટે મસ્ત એનિમેશન પણ આપેલાં છે. એવું જ બીજું ઠેકાણું છે માઇક્રોસોફ્ટનું ‘એક્સેસિબિલિટી’. વડીલોને આંગળી પકડીને બતાવવાં જેવાં આવાં બીજાં ઠેકાણાં:gcflearnfree.org/internet, meganga.com, good50.com, good50.com વગેરે.