ઘેર બેઠા ચપટીમાં કરો, મોબાઈલથી રિઝર્વેશન

 

આઈઆરસીટીસીએ મોબાઇલ દ્વારા રેલવે રિઝર્વેશનની સુવિધા વ્યાપક ધોરણે શરૂ કરી છે. આ માટે મોબાઇલ પર જ ટિકિટ સંબંધિત જાણકારી મળશે.

હવે રેલવે યાત્રી માટે રિઝર્વેશન કરાવવું ઘણું સરળ થઇ ગયું છે. ભારતીય રેલવે દ્વારા મોબાઇલ દ્વારા ટિકિટ રિઝર્વેશન કરાવવાની સુવિધા શરૂ કરવામાં આવી છે. ઈન્ડિયન રેલવે કેટરિંગ એન્ડ ટૂરિઝમ કોર્પોરેશને (આઇઆરસીટીસી) આ સર્વિસ વિકસાવીને અલગ રીતે તેની વેબસાઇટ પણ લોન્ચ કરી દીધી છે.

*કઇ રીતે ઉપયોગ કરાય

https://www.irctc.co.in/mobile પર તમારે જવું પડશે, પછી ત્યાંથી આ માટેનું ઉપયોગી સોફટવેર મોબાઇલ પર ડાઉનલોડ કરવાનું હોય છે.

*સુવિધાયુકત છે વેબસાઇટ

આઇઆરસીટીસી દ્વારા મોબાઇલ રિઝર્વેશન માટે તૈયાર કરવામાં આવેલી સાઇટ ઘણી જ યૂઝર ફ્રેન્ડલી છે. સાઇટના પીસી વર્ઝનની જેમ જ મોબાઇલ પર પણ બધું ડિસપ્લે થાય છે. એટલે સુધી કે બુકિંગ હિસ્ટ્રીથી લઇને ટિકિટ રદ કરાવવા સુધીની સુવિધા આપવામાં આવી છે.

પૈસા ચૂકવવા માટે ક્રેડિટ કે ડેબિટ કાર્ડની સુવિધા પણ આપવામાં આવી છે. આ ઉપરાંત અલગ અલગ સ્ટેશનો વરચે ચાલતી ટ્રેન અને તેના સમય વિશેની માહિતી પણ જાણી શકાય છે.

*પ્રોસેસ શું છે

જીપીઆરએસ સુવિધા ધરાવતા કોઈપણ મોબાઇલ ધારક તેનાથી રેલવે ટિકિટ કઢાવી શકે છે. તેનો લાભ મેળવવા માટે યૂઝર પાસે આઇઆરસીટીસીનું આઇડી અને પાસવર્ડ હોવો જરૂરી છે.

બાકી બધી પ્રોસેસ ઈ-ટિકિટ જેવી જ છે. આ માટે સ્લીપર માટે ૧૦ તો ઉરચ શ્રેણી માટે ૨૦ રૂપિયા સર્વિસ ચાર્જ આપવો પડશે.

*મોબાઇલ પર આવી જશે ટિકિટ

ટિકિટ બુક કરાવવાની પ્રક્રિયા પૂરી થઈ જતાં જ યૂઝરના મોબાઇલ પર બધી જાણકારી આવી જશે. તેમાં પીએનઆર નંબરથી લઇને ટ્રેન નંબર, મુસાફરીની તારીખ અને કલાસ સહિતની તમામ વિગત હોય છે.

આમ, હવે આ સરળતાને કારણે લોકો હવે હરતા-ફરતા પોતાની ટિકીટનું રિઝર્વેશન કરાવીશકશે તેમજ લાંબી લાઈનમાં ઊભા રહેવાની ઝંઝટમાંથી છૂટકારો મેળવી શકાશે.