એક વર્ષ બાદ દાદાએ દેખાડ્યો દમ, પૂણેને અપાવ્યો વિજય

- છેવટે 1 વર્ષ અને 21 દિવસો બાદ મળ્યો દાદાને મોકો

હૈદરાબાદમાં રમાયેલી ડેક્કન ચાર્જર્સ અને પૂણે વોરિયર્સ વચ્ચેની મેચમાં પૂણેએ 6 વિકેટે ડેક્કનને હરાવ્યું હતું.

પૂરા 1 વર્ષ અને 21 દિવસ બાદ આઇપીએલમાં પાછા ફરેલા સૌરવ ગાંગુલીએ અણનમ રહીને પોતાની નવી ટીમ પૂણે વોરિયર્સને જીત અપાવવામાં મહત્વની ભૂમિકા ભજવી હતી.

ગાંગુલીએ 32 બોલમાં 1 છગ્ગા અને 3 ચોગ્ગાની મદદથી અણનમ 32 રન નોંધાવી મહત્વનું યોગદાન આપ્યું હતું.

ટીમ ઇન્ડિયાના પૂર્વ કેપ્ટન સૌરવ ગાંગુલીએ 1 વર્ષ અને 21 દિવસો બાદ આઇપીએલમાં પૂનરાગમન કર્યું હતું. પાછલી ત્રણ સિઝન દરમિયાન કોલકાતાના મહત્વના ખેલાડી રહ્યા બાદ ગાંગુલી આ વખતે પૂણે વોરિયર્સમાંથી રમ્યો હતો પરંતુ આ 1 વર્ષ જેવો મુશ્કેલ સમય દાદાએ ક્યારેય નહીં જોયો હતો.

પહેલા કોલકાતાના માલિક શાહરૂખે આઇપીએલની ટીમમાંથી ગાંગુલીને બહાર કાઢ્યો પછી વર્ષ 2011ની હરાજીમાં કોઇએ દાદાનો ભાવ પણ ન પૂછ્યો. પાછલી ત્રણ સિઝનમાં જોરદાર પ્રદર્શન કર્યું હોવા છતાં સૌ ફ્રેન્ચાઇઝીએ આ વખતે દાદાથી મોં ફેરવી લીધું હતું.

ગાંગુલીનું આઇપીએલ કેરિયર ઉતાર-ચડાવથી ભરેલું છે. તેના બેટમાંથી રન તો નિકળ્યા પરંતુ ટીમને જીત ન મળી શકી. આ જ કારણોસર વર્ષ 2009માં શાહરૂખખાને તેની પાસેથી કેપ્ટનશિપ પણ છીનવી લીધી. જો કે 2010માં તેને ફરીથી કેપ્ટન બનાવાયો પરંતુ સિઝન પૂરી થતાં જ કોલકાતામાંથી તેની હકાલપટ્ટી થઇ.