ગુજરાતમાં 4.3 ટકા કન્યાઓ પણ તમાકુની બંધાણી

- ગુજરાતમાં શાળાના 29.3 ટકા વિદ્યાર્થીઓને તમારુની લત
- રાજ્યમાં વ્યસનીઓની સંખ્યા વધી રહી છે
- ગુજરાતમાં અંદાજે 110 વ્યક્તિ વ્યસનને કારણે મોતને ભેટે છે

આવતીકાલે જ્યારે સમગ્ર વિશ્વમાં વિશ્વ તમાકુ નિષેધ દિવસ ઉજવાશે ત્યારે ગુજરાતમાં તમાકુના વ્યસનીઓની સંખ્યામાં ચિંતાજનક વધારો થઇ રહ્યો છે. આંકડાકીય માહિતી અનુસાર ગુજરાતમાં બાળકોમાં તમાકુનું વ્યસન વધી રહ્યું છે. ગુજરાતમાં 4.3 ટકા કન્યાઓ પણ તમાકુની બંધાણી છે.

આ અંગે મળતી માહિતી અનુસાર દેશમાં તમાકુના સેવનથી થતાં વિવિધ રોગને કારણે દરરોજ સરેરાશ 2200 લોકો મૃત્યુ પામે છે જ્યારે ગુજરાતમાં આ સંખ્યા 110 વ્યક્તિઓની છે.

તાજેતરમાં કરાયેલા એક સર્વેક્ષણ અનુસાર રાજ્યની વિવિધ શાળામાં અભ્યાસ કરનારા 29.3 ટકા વિદ્યાર્થીઓને તમાકુની લત લાગી છે. જ્યારે 4.3 ટકા વિદ્યાર્થિનીઓને પણ તમાકુની વિવિધ બનાવટોનું સેવન કરવાની આદત પડી છે. આ ઉપરાંત 46.2 ટકા પુરુષો અને 11.3 ટકા મહિલાઓ તમાકુનું સેવન કરે છે.

આ અંગે ગુજરાતના આરોગ્યમંત્રી જયનારાયણ વ્યાસે જણાવ્યું હતું કે, રાજ્ય સરકાર દ્વારા લોકોમાં તમાકુથી થતાં નુકસાન અંગે જાગૃતિ ફેલાવવા માટે વિવિધ પ્રોજેક્ટ અમલમાં મુકવામાં આવ્યા છે.

તેમણે માહિતી આપી હતી કે 31મી મે, વિશ્વ તમાકુ નિષેધ દિવસથી અમદાવાદ અને ગાંધીનગરમાં ફ્લાઇંગ સ્કવોડ શરૂ કરવામાં આવશે. જેનું કામ જાહેરસ્થળો પર જનજાગ-તિ ફેલાવવાનું રહેશે તથા જરૂર પડશે તો જાહેરમાં તમાકુનું સેવન કરનારા સામે કાયદેસરના પગલાં પણ લેવામાં આવશે.