ગુજરાતના બાળકોનો જીવ લઇ રહ્યો છે ભેળસેળયુક્ત ખોરાક

- સગર્ભાઓને નડી રહી છે સમસ્યા
- સ્વાદુપિંડને લગતા કેન્સરના વધેલા કિસ્સા
- બિનઆરોગ્યપ્રદ ખોરાકથી આરોગ્યને લગતી મુશ્કેલીઓ નડે છે લોકોને

ગુજરાતમાં તાજેતરના સમયમાં ડાયરિયાને કારણે મૃત્યુ પામાનારા પાંચ વર્ષથી નીચેની વયના બાળકોના થયેલા મૃત્યુ માટે ભેળસેળયુક્ત આહાર મુખ્ય કારણ હોઇ શકે છે તેમ આ ક્ષેત્રના નિષ્ણાતો માની રહ્યા છે.

આ અંગે જાણકારોના જણાવ્યા અનુસાર મોટાભાગે સગર્ભાઓ રોડ પર ખુલ્લામાં મળનારા ખાદ્ય પદાર્થો આરોગતી હોવાથી તેની અસર ગર્ભમાં રહેલા શિશુને પણ પહોંચે છે. બિનઆરોગ્યપ્રદ ખોરાકને કારણે અનેક નવજાત શિશુઓ જન્મજાત રોગ કે ઇન્ફેકશન સાથે જન્મે છે.

તાજેતરમાં વર્લ્ડ ડાઇજેસ્ટિવ હેલ્થ ડેની ઉજવણી દરમિયાન આ ક્ષેત્રના જાણકારોએ મત વ્યક્ત કર્યો હતો કે તાજેતકના દાયકામાં એવું જોવા મળ્યું છે કે ભેળસેળયુક્ત આહારને કારણે સગર્ભા મહિલાને પૂરતા પ્રમાણમાં પોષણ મળતું નથી જેની અસર ગર્ભસ્થ શિશુને પણ થાય છે.

તાજેતરના સમયમાં ગુજરાતમાં પાચનને લઇને વધેલા ઇન્ફેકશન તથા સ્વાદુપિંડને લગતા કેન્સરના વધેલા કિસ્સા દર્શાવે છે કે રાજ્યમાં બિનઆરોગ્યપ્રદ અને હલકી ગુણવત્તાવાળા ખાદ્ય પદાર્થોનું વેચાણ વધ્યું છે.

આ પ્રસંગે ગુજરાત ગેસ્ટ્રોએન્ટ્રોલોજી સોસાયટીના સેક્રેટરી ડૉ.શ્રવણ બોહરાએ જણાવ્યું હતું કે, મોટાભાગની મિઠાઈઓમાં ઝેરી તત્વ ધરાવતા રંગોનો ઉપયોગ થાય છે અને હલકી ગુણવતાવાળા ભેળસેળિયા ખાદ્ય પદાર્થોને કારણે ગુજરાતમાં આરોગ્યને લગતી સમસ્યા વધતી જાય છે. ખાસ કરીને બાળકો અને વડિલોમાં આ પ્રકારની સમસ્યા વધારે જોવા મળી રહી છે.