આઈપીએલ-૪: ચેન્નાઈ ફરી બન્યું 'સુપરકિંગ'

આઈપીએલમાં સતત બીજા વર્ષે ચેન્નાઈ વિજેતા
ભારતને વર્લ્ડ ચેમ્પિયન બનાવ્યા પછી ધોનીની વધુ એક સફળતા
ચેન્નાઈ ૨૦૫, મુરલી વિજય ૯૫, બેંગલોરનો ૫૮ રને પરાજય


ઈન્ડિયન પ્રીયિમર લીગની ચોથી સિઝનની ટી૨૦ ક્રિકેટ ટૂનૉમેન્ટમાં શનિવારે રમાયેલી ફાઇનલમાં ધોનીની ચેન્નાઈની ટીમ શાનદાર પ્રદર્શન કરીને લગભગ એક તરફી બની ગયેલા મુકાબલામાં રોયલ ચેલેન્જર્સ, બેંગલોરને ૫૮ રનથી હરાવીને ટાઇટલ જીતી લીધું હતું.

ગયા વર્ષે મુંબઈને હરાવીને ચેમ્પિયન બનેલી ચેન્નાઈની ટીમે શનિવારે ઘરઆંગણે ચેપોકના મેદાન પર રમાયેલી ફાઇનલમાં પણ શ્રેષ્ઠ દેખાવ કર્યો હતો. ટોસ જીતીને પ્રથમ બેટિંગ કરતાં ચેન્નાઈએ માઇકલ હસ્સી અને મુરલી વિજયની અડધી સદીની મદદથી ૨૦ ઓવરમાં પાંચ વિકેટે ૨૦૫ રન નોંધાવ્યા હતા જેના જવાબમાં બેંગલોરની ટીમ ૨૦ ઓવરમાં આઠ વિકેટે ૧૪૭ રન કરી શકી હતી.

૨૦૬ રનના વિશાળ લક્ષ્યાંક સામે ક્રિસ ગેઇલ પહેલી ઓવરમાં જ અશ્વિનના બોલે શૂન્ય પર આઉટ થઈ જતાં બેંગલોરનો અડધો પડકાર શમી ગયો હતો અને તેમાં જકાતી તથા રૈનાએ વધારે નુકસાન કરીને હરીફને આસાનીથી હંફાવી દીધા હતા.  અગાઉ હસ્સી અને વિજયે ચેન્નાઈ માટે આક્રમક પ્રારંભ કર્યો હતો.

તાજેતરમાં જ વેસ્ટ ઇન્ડીઝના પ્રવાસ માટેની ભારતીય ટીમમાં પસંદ કરાયેલા મુરલી વિજયે પોતાની પસંદગી સાર્થક કરી દેખાડતી બેટિંગ કરી હતી. તેણે હસ્સી સાથે  પ્રથમ વિકેટ માટે માત્ર ૧૪.૫ ઓવરમાં જ ૧૫૯ રનની ભાગીદારી નોંધાવી દીધી હતી.

એક તબક્કે એમ લાગતું હતું કે આ જોડી અલગ થયા વિના જ ૨૦ ઓવર રમી નાખશે ત્યારે સૈયદ મોહમ્મદની બોલિંગમાં સિકસર ફટકારવાના પ્રયાસમાં માઇકલ હસ્સી ૬૩ રનના અંગત સ્કોરે આઉટ થયો હતો. ઓસ્ટ્રેલિયન બેટ્સમેને ૪૫ બોલની ઇનિંગ્સમાં ત્રણ સિકસર અને ત્રણ બાઉન્ડ્રી ફટકારી હતી. વિજયે બાવન બોલમાં છ સિકસર સાથે ૯૫ રન નોંધાવ્યા હતા.