વ્યક્તિ વસ્ત્રોમાં A.C. લગાવી શકશે

વિજ્ઞાનીઓએ ‘પર્સનલ એર-કન્ડિશનિંગ(એસી)યુનિટ’ વિકસાવ્યું હોવાનો દાવો કર્યો છે, જેને ફાયરફાઇટર્સથી માંડીને રેસિંગ ડ્રાઈવર્સ સુધીની દરેક વ્યક્તિનાં વસ્ત્રોમાં ફિટ કરી શકાશે. ઘરવપરાશના ફ્રીજ માટેના કમ્પ્રેસર્સના ઉત્પાદનમાં વિશ્વ અગ્રણી બ્રાઝિલિયન કંપની એમ્બ્રેકોની ટીમનું કહેવું છે કે તેના નવા યુનિટથી કાર્યસ્થળે ઊંચાં તાપમાનનો સામનો કરતા લોકો તેઓનાં શરીરનું તાપમાન ઘટાડી શકશે અને હાથ પરનાં કામમાં ધ્યાન કેન્દ્રિત કરવામાં મદદ કરશે.

‘ધ ડેઈલી ટેલિગ્રાફ’ના અહેવાલ અનુસાર આ પર્સનલ એર-કન્ડિશનિંગ યુનિટ પેનથી થોડું લાંબું છે. ચાર ઇંચ લાંબા અને બે ઇંચ પહોળા આ એસીનું વજન માત્ર ૩.પ ઔંસ છે, જે એક પેન્સના ૪૦ સિક્કાઓની સમકક્ષ છે.આ યુનિટને વસ્ત્રોનાં કાપડમાં સીવી શકાશે. દાખલા તરીકે ફાયરબ્રિગેડના કર્મચારીઓ કે સૈનિકોના યુનિફોર્મમાં અથવા રેસિંગ ડ્રાઈવર્સના કોટમાં એસીને લગાવી શકાશે અને તેનાથી વ્યક્તિને કોઈ અગવડ નહીં પડે.

એસીના નિર્માતાઓનું કહેવું છે કે તાપમાન વધતાં ગરમ હવાને સ્ટીલની પાતળી પેટીમાં ચૂસવામાં આવશે, જ્યાં માઈક્રોપ્રોસેસર હવાને ઠંડી કરશે અને પછી વસ્ત્રોમાંથી પાતળી ટ્યૂબોનાં નેટવર્ક દ્વારા ઠંડી હવાને બહાર ફેંકશે. એમ્બ્રેકોના ગ્લોબલ પ્રેસિડન્ટ જોઆઓ કાર્લોસ બ્રેગાએ જણાવ્યું હતું કે કંપનીએ આ શોધની ચર્ચા ફોમ્યુંલા વન ટીમો, લશ્કરો અને અગ્નિશામક દળો સાથે કરી છે. જો કે કંપની સામાન્ય વ્યક્તિને તેના વસ્ત્રોમાં ફિટ કરવા માટે છુટક એસી નહીં વેચે.