“હવે વિશ્વના લોકો ગુજરાતને પોતાનું ઘર બનાવશે”

ભરૂચના દહેજ સેઝમાં ડેન્માર્કની રોકસુલ-રોકવુલ કંપનીનું મુખ્યમંત્રી નરેન્દ્ર મોદીના હસ્તે ઉદ્ઘાટન

ભરૂચ જિલ્લાના દહેજ ખાતે ડેન્માર્કની રોકસુલ-રોકવુલ કંપનીનું ઉદ્ઘાટન કર્યા બાદ મુખ્યમંત્રી નરેન્દ્ર મોદીએ જણાવ્યું હતું કે, વાઇબ્રન્ટ ગુજરાતમાં વાઇબ્રન્ટ ઇકોનોમી પોલીસીને કારણે આવનારા દિવસોમાં વિશ્વના અનેક દેશોની કંપનીઓ ગુજરાતમાં હશે.

મુખ્યમંત્રી મોદીએ ગુજરાતના લોકોની વેપારની સૂઝનો ઉલ્લેખ કરી જણાવ્યું હતું કે, વર્ષો અગાઉ ગુજરાતીઓ વેપાર-ધંધા માટે દરિયાપારના દેશોમાં જઇને વસ્યા હતા. એટલું જ નહીં ગુજરાતીઓએ વિશ્વને પોતાનું ઘર બનાવી દીધું હતું. પરંતુ હવે સમય બદલાયો છે. ગુજરાતમાં વેપાર-ધંધા, ઉદ્યોગની ખુલી રહેલી નવી ક્ષિતજિને કારણે વિશ્વની અનેક કંપનીઓ ગુજરાતમાં મૂડી રોકાણ કરી રહી છે.

મુખ્યમંત્રી મોદીએ ઉલ્લેખ કર્યો હતો કે, વર્ષો અગાઉ જેમ ગુજરાતીઓએ વેપાર-ધંધા માટે વિશ્વને પોતાનું ઘર બનાવ્યું હતું, હવે આગામી વર્ષોમાં વિશ્વના લોકો ગુજરાતને પોતાનું ઘર બનાવે એ દિવસો દૂર નથી.