આ રહ્યું કંટાળો દૂર કરવાનું બ્રહ્માસ્ત્ર

 

 

એવા લોકોને કંટાળો આવે છે, જેઓ પોતે કંટાળાજનક હોય છે. આવું અગિયાર વર્ષના એક બાળકે કહેલું છે. એનું કહેવું છે કે જિંદગી દરેક પળે તમને આનંદાશ્વર્યમાં મૂકી દે છે, જો તમે તે માટે તૈયાર હો, તો...

એક વ્યક્તિએ કંટાળા પર લખતી વખતે પહેલાં આ પંક્તિઓ લખી છે, ‘અમે ભણેલાગણેલા લોકો ખૂબ ઝડપથી જાતને વ્યસ્ત રાખતી ચાર-પાંચ બાબતોની યાદી બનાવી લઇએ છીએ. જેમ કે સમય મળે તો મિત્રોને મળવું, પુસ્તકો વાંચવા, બગીચામાં ફરવા જવું, મિત્રોને ફોન કરવો, ઘરની નજીકમાં જ ક્યાંક લટાર મારી આવવી વગેરે. શું કાયમ આટલા જ વિકલ્પો હોય છે? ત્યારે તો કંટાળવાથી પણ કંટાળો આવવા લાગશે.’

કંટાળાની અસર પહેલાં મન પર થાય છે અને પછી ચહેરા પર. જો આને દૂર કરવો હોય તો તેનો પ્રારંભ ઊંધી રીતે એટલે કે ચહેરાથી કરી શકાય છે. કપાળ પરથી કરચલીઓ દૂર કરીને, ચહેરા પર સ્મિત લાવો, તો આપોઆપ નિસ્તેજ બની ગયેલી ત્વચા કાંતિવાન બની જશે. હવે બીજું મહત્વનું પગલું છે, કંટાળો આવવાનું કારણ જાણી લો.

જો કારણ નજર સામે હોય. જેમ કે, અસ્તવ્યસ્ત પડેલી વસ્તુઓ, રૂમ વ્યવસ્થિત ગોઠવવો વગેરે ઉપાય તો તમારી પાસે છે જ. જો કોઇ પણ પ્રકારની એકવિધતાને લીધે કંટાળો આવતો હોય, તો તેને દૂર કરવાનો ઉપાય તમારે જ વિચારવાનો રહેશે. જેમ કે, એ અગિયાર વર્ષના બાળકનો અનુભવ કહે છે, ‘નવીનતા દરેક બાબતમાં શોધી શકાય છે. પોતાની સોસાયટીના ભાગમાં, શહેરના અજાણ્યા માર્ગો પર, મિત્રોમાં, નવી ભાષામાં... દરેક પળે કંઇ ને કંઇ નવું કરતાં રહીએ તો કંટાળો આવવાનું કોઇ કારણ જ નહીં રહે.’ અને કંટાળો દૂર કરવાનું એક બ્રહ્નાસ્ત્ર છે.

રોજિંદી દિનચર્યામાં ઓતપ્રોત થઇ જવું. કંટાળો આખરે આવે છે ક્યાંથી? આપણે જ્યારે આપણા રોજિંદા કામથી અકળાઇ જઇએ છીએ, તેના પ્રત્યે અણગમો ઉત્પન્ન થવા દઇએ છીએ, ત્યારે જ કંટાળો આવે છે ને? તો તેના બદલે દરેક કામને દિલથી સ્વીકારી લઇએ. એ કામ કરવાની રીત, પ્રક્રિયાને પસંદ કરીએ. કંટાળો દૂર થઇ જશે.

કેટલાક કામ એવા હોય છે કે આપણે કરવા જ પડે છે. જેમ કે, ઘરનું કામકાજ. આપણા સિવાય બીજું કોઇ તે નથી કરી શકતું, કરવાનું પણ નથી. તો પછી હસીને જ શા માટે ન કરવું?એટલું માની લો કે તમારો ઉદાસ, અકળાયેલો ચહેરો કંટાળાને ખૂબ પસંદ છે. તમે કંટાળશો અને કંટાળો ખુશ થશે. તમે હસતાં રહેશો, તો કંટાળો નજીક નહીં આવે.