પાટણ સમગ્ર વિશ્વના નકશામાં સૂર્યની જેમ ઝળહળી ઉઠશે

>> ચારણકા ગામની પડતર ૧૦૮૦ હેકટર જમીનમાં સોલર પાર્કની સ્થાપના>> રૂ.૧૨૪૭ કરોડના ખર્ચે સ્થપાયેલા વિશ્વના સૌથી મોટા પ્રોજેક્ટનું નરેન્દ્ર મોદીના હસ્તે થશે લોકાર્પણ

પાટણ જિલ્લો સમગ્ર વિશ્વના નકશામાં સૂર્યની જેમ ઝળહળી ઉઠવાનો છે તેવા મુખ્યમંત્રી મોદીના શબ્દો ગુરુવારે તેમના જ વરદહસ્તે જિલ્લાના રણકાંઠે સાકાર સ્વરૂપ ધારણ કરવાના છે. રાજ્ય સરકારના ગુજરાત પાવર કોર્પોરેશન લિમિટેડ દ્વારા રૂ.૧૨૪૭ કરોડના ખર્ચે સ્થપાયેલો વિશ્વનો સૌથી મોટો ગુજરાત સોલાર પાર્ક મુખ્યમંત્રીના હસ્તે રાજ્યને અર્પણ કરાશે. 

સાંતલપુર તાલુકાના રણકાંઠે ચારણકા ગામની પડતર ૧૦૮૦ હેકટર જમીન સોલર પાર્કની સ્થાપના માટે ગુજરાત પાવર કોર્પોરેશન લિમિટેડને સુપરત કરાઇ હતી. જેમાં દોઢ મહિનાની કામગીરીના પરિણામરૂપે પ૦૦ મેગાવોટ વીજળી ઉત્પાદન કરવા માટેનો પાર્ક તૈયાર થઇ ગયો છે. 

આ પ્રોજેક્ટ સંકુલમાં રોડ, પાણી, ગટરલાઇન સહિતની સુવિધાઓ ઉભી કરવામાં આવી છે અને તેમાં સૌર ઊર્જા ક્ષેત્રની અન્ય વિવિધ ૩૦ જેટલી કંપનીઓને પણ જરૂરિયાત મુજબ પ્લોટ સોંપવામાં આવનાર છે તેવું પ્રોજેક્ટ ઇન્ચાર્જ ભરતભાઇ ગોસ્વામીએ જણાવ્યું હતું. તેમણે વધુમાં ચારણકા તેમજ આસપાસના ગામોને જોડતાં હાઇવે, ગટર વ્યવસ્થા, એસ.ટી. સેવા સહિતની સુવિધાઓ ઉભી કરનાર હોવાનું પણ ઉમેર્યું હતું. 

જિલ્લામાં રણકાંઠે કાંઇપણ કરવાનો વિચાર શુદ્ધાં કરાયો નહોતો ત્યારે મુખ્યમંત્રી નરેન્દ્રભાઇ મોદી દ્વારા સોલાર પ્રોજેક્ટ સ્થાપિત કરવાની દિશામાં નક્કર પગલાં ભરાયાં હતા. જેમાં જિલ્લાના પ્રભારી મંત્રી આનંદીબહેન પટેલ, રાધનપુર-સાંતલપુરના ધારાસભ્ય શંકરભાઇ ચૌધરી તેમજ જીપીસીએલના સચિવ-ચેરમેન અને એમડી ડી.જે. પાંડિયને પ્રોજેક્ટ વિના વિલંબે સમયસર કાર્યરત કરવામાં રસ દાખવ્યો હતો. મુખ્યમંત્રીનું નવતર પ્રદાન સાંતલપુર પંથકના ઔદ્યોગિક વિકાસના દ્વાર ખોલી નાંખશે તેવું ધારાસભ્ય શંકરભાઇ ચૌધરી, પ્રદેશ કારોબારી સદસ્ય ભરતભાઇ રાજગોર અને જિલ્લા પંચાયત પ્રમુખ મોહનભાઇ પટેલે જણાવ્યું હતું. 

મુખ્યમંત્રીના હસ્તે સોલાર પાર્ક ફેઝ-૧ના ઉદ્ઘાટન પ્રસંગે ઊર્જા પેટ્રોકેમિકલ મંત્રી સૌરભભાઇ પટેલ, પ્રભારી મંત્રી આનંદીબહેન પટેલ, ધારાસભ્ય શંકરભાઇ ચૌધરી તેમજ ગુજરાત ઊર્જા વિકાસ એજન્સીના ચેરમેન આઇ.એમ. ભાવસાર વગેરે મહાનુભાવો હાજરી આપશે. 

>> પર્યાવરણને શુદ્ધ રાખી શકાશે

ચારણકામાં રૂ.૧૨૪૭ કરોડના ખર્ચે તૈયાર થનારા સૌરઊર્જા પાર્કથી ૫૦૦ મેગાવોટથી વધુ વીજળી પુન:પ્રાપ્ય ઊર્જાસ્ત્રોતથી મેળવાશે. જેના કારણે આશરે આઠ લાખ મિલિયન ટન કાર્બન ડાયોક્સાઇડનું ઉત્પાદન ઘટશે. કોલસો-ગેસનો બચાવ થશે. પર્યાવરણને શુદ્ધ રાખી શકાશે.