મનને જીતવું અઘરું છે, અશક્ય નથી

મન આપણા શરીરનું સૌથી ચંચળ અવયવ છે, મનને જીતવું અઘરું છે, અશક્ય નથી. મનને સાધવામાં અથવા તેને જીતવામાં ઘણા લોકોના વરસો નીકળી જાય છે.

યુવા પેઢીમાં આ સમસ્યા સૌથી વિશેષ જોવા મળે છે કારણ કે, તેમનું મન એક જગ્યાએ સ્થિર રહેતુ નથી. અભ્યાસ, રમત, નોકરી અથવા અંગત જીવન બધે યુવાઓ ચંચળ મનની આજ્ઞા અનુસાર જ ચાલતા હોય છે. મન લાગ્યુ ત્યાં સુધી કામ કર્યુ, નહી તો છોડી દીધુ. મનનું કહ્યું કરવું યુવાઓનો સ્વભાવ થઈ ગયો છે. અને અહીં થી જ શરૂ થાય છે અસફળતા અને અશાંતિની સફર. આવા ચંચળ મનના લોકો જીવનભર સતત ભાગતા રહે છે. ખૂબ પૈસા બનાવા છતાં જીવનના કોઈને કોઇ તબક્કામાં તેઓ નિષ્ફળતા અને અશાંતિનો અનુભવ કરે છે.

મનને સાધવું એ ખૂબ મોટો પડકાર છે. હવે પ્રશ્ન એ થાય કે મનને કેવી રીતે જીતવું? મૂળભૂત રીતે આ એક દિવસનું કાર્ય નથી, પરંતુ સતત કરવો પડતો અભ્યાસ છે. આ ક્રિયા મુશ્કેલ છે પરંતુ અશક્ય નથી. જીવનમાં કાયમી શાંતિ અને સુખની ઈચ્છા હોય તો મનને સાધવું જ પડશે. મનને સાધવાથી સૌથી મોટો ફાયદો એ થાય છે કે તે આપણને એક રસ્તા પર લાવે છે, સતત ભટકતા રહેવાની ક્રિયમાંથી મુક્તિ અપાવે છે.