અડગ નારી, હિંમત ન હારી...

ભાસ્કર વુમન ઓફ ધ યર’ની આ વિજેતાએ મુશ્કેલીઓ સામે બાથ ભીડીને પોતાના પરિવારને અડીખમ રાખ્યો છે. તેમના જીવનની ખુલ્લી કિતાબના થોડા પાનાં પર નજર નાખીએ.....

ભોપાલની એક સામાન્ય મહિલા જેણે ભાસ્કર વુમન ઓફ ધ યર ૨૦૧૦ના પબ્લિક ચોઇસ સ્ટેટ વિનર એવોર્ડ મેળવ્યો છે. આ મહિલાનું નામ છે, શીલા માલવીય. શીલા માલવીયના સંઘર્ષની વાત તેમના જ શબ્દોમાં... ‘

અમે પાંચ ભાઇ-બહેનોમાં નાના ભાઇના હૃદયમાં કાણું હતું. પિતાની મોટા ભાગની કમાણી એની સારવાર પાછળ ખર્ચાઇ જતી. એટલે આર્થિક સ્થિતિ નબળી. મારી માતાએ બાળકોને ટ્યૂશન આપવાનું શરૂ કર્યું. ઘરમાં મોટી હોવાથી મેં તેમને મદદ કરી. એ વખતે મને વોલીબોલ રમવું, રંગોળી કરવી અને ભણવું અને બાળકોને ભણાવવું આ ચાર પ્રવૃત્તિઓ કરવી ખૂબ ગમતી. ૧૧મા ધોરણમાં ભણતી હતી ત્યારે મારા માટે માગુ આવ્યું. કુટુંબ સારું હતું એટલે લગ્ન નક્કી થઇ ગયા.

સાસરે ગઇ ત્યારે નક્કર વાસ્તવિકતા જાણી. મારા કરિયાવરથી પતિને સંતોષ નહોતો. તેમણે કહ્યું, ‘તારે ત્યાંથી મને દહેજમાં શું મળ્યું?...’ ઉપરાંત કેટલાય મહેણાં-ટોણાં માર્યા. આટલું ઓછું હોય એમ, લગ્ન પહેલાં સાસરા વિશે જે કંઇ પણ સાંભળ્યું હતું તેના કરતાં હકીકત કંઇક જુદી જ હતી. પતિની કમાણી અને સસરાના પેન્શનમાંથી સારી રીતે ઘર ચલાવવું મુશ્કેલ હતું. એક રૂમના મકાનમાં અમે પાંચ જણા રહેતા હતા. પતિ મારા પર હાથ ઉપાડે પછી જ શાંત પડતા. પિતાને જ્યારે કડવી વાસ્તવિકતાની ખબર પડી ત્યારે તેમને ગુસ્સો આવ્યો, પણ તેઓ અફસોસ કરતા.