સ્ટેઈનનો સફળતા મંત્ર, જીદ કરો વિકેટ લો

- પ્રથમ દાવમાં સ્ટેઈનની છ વિકેટ
- સ્ટેઈનના ઝંઝાવાત સામે ભારતીય બેટ્સમેનો લાચાર

પ્રથમ દિવસે પોતાની વેધક બોલિંગની મદદથી ભારતીય ટોપ ઓર્ડરને વેરવિખેર કરનારા દક્ષિણ આફ્રિકાના ઝડપી બોલર ડેલ સ્ટેઈને બીજા દિવસે પણ ભારતીય બેટ્સમેનોને ઘૂંટણીયે પડવા મજબૂર કર્યા હતા.

ડેલ સ્ટેઈનને પ્રથમ દિવસે ચાર વિકેટ લીધી હતી જ્યારે બીજા દિવસે તેણે બે બેટ્સમેનોને પોતાનો શિકાર બનાવ્યા હતા. સ્ટેઈનની છ વિકેટની મદદથી ભારતનો પ્રથમ દાવ 205 રનમાં સમેટાયો છે.

પરંતુ સ્ટેઈનનું કહેવું છે કે તેની જીદે તેને વિકેટો અપાવી છે. તેણે કહ્યું છે કે તેને શરૂઆતની ઓવરોમાં જ પોતે સફળ રહેશે તે વાતનો અંદાજ આવી ગયો હતો. તેથી જ તેણે સુકાની ગ્રીમ સ્મિથ સામે જીદ કરીને બોલિંગ કરતો રહ્યો અને તેને વિકેટ મળતી રહી.

સ્ટેઈને જણાવ્યું હતું કે મને શરૂઆતમાં જ ખબર પડી ગઈ હતી કે આ પિચ પર મને વિકેટ મળશે. માટે મેં જીદ કરીને બોલિંગ કરી હતી. જ્યારે પણ સ્પેલ સમાપ્ત કરવાનો સમય આવતો ત્યારે સ્મિત મારી પાસેથી બોલ આંચકી લેવા ઈચ્છતો હતો. પરંતુ હું કહેતો કે બસ એક છેલ્લી ઓવર ફેંકવા દો.

તે એક જીદ્દી ઓવર હતી જેમાં મેં સૌ પ્રથમ વિરેન્દ્ર સેહવાગને આઉટ કર્યો હતો. પછી એવી જ એક ઓવરમાં મુરલી વિજયને પણ પેવેલિયન પરત મોકલ્યો હતો. આ વિકેટ મહત્વના સમયે મળી હતી, તેમ સ્ટેઈને ઉમેર્યુ હતું.