'2-જી કૌભાંડમાં સોનિયા ગાંધીને ૩૬,૦૦૦ કરોડ મળ્યા'

- અમદાવાદમાં ડૉ. સુબ્રમણ્યમ સ્વામીનો ધડાકો

- જાન્યુઆરીમાં સુપ્રીમ કોર્ટમાં રાજાની સાથે સોનિયા અને કરુણાનિધિનાં નામ પણ દાખલ કરાશે

કેન્દ્રમાં આચરાયેલા રૂપિયા ૬૦ હજાર કરોડના ૨જી સ્પેકટ્રમ કૌભાંડમાં ૩૫ ટકા મુજબ કમિશન મળ્યું છે. જેમાંથી પૂર્વ કેન્દ્રીય મંત્રી રાજાને માત્ર ૧૦ ટકા લેખે ૬ હજાર કરોડ મળ્યાં છે,બાકીના ૧૮ હજાર કરોડ કરુણાનિધિને મળ્યાં છે,જ્યારે ૩૬ હજાર કરોડ કોંગ્રેસના રાષ્ટ્રિય અધ્યક્ષ સોનિયા ગાંધીના હિસ્સે આવ્યાં છે. 

જે તેમણે તેમની બે બહેનોને વિદેશ મોકલી આપ્યાં છે એટલે તેના ટ્રાન્ઝેક્શનની વિગત અમેરિકા પાસેથી મંગાવવામાં આવી છે.જે મળી ગયા બાદ જાન્યુઆરી-૨૦૧૧માં સુપ્રીમ કોર્ટમાં રાજાની સાથોસાથ કરુણાનિધિ અને સોનિયા ગાંધીના નામો પણ દાખલ કરવામાં આવશે.

અમદાવાદમાં ભારતીય વિચાર મંચના ઉપક્રમે ‘શું ભ્રષ્ટાચાર ભારતની સૌથી મોટી સમસ્યા છે?’ એ વિષયમાં ટુ-જી સ્પેકટ્રમ ટેલિકોમ કૌભાંડને સંદર્ભ બનાવીને પૂર્વ કેન્દ્રીય મંત્રી તથા જનતા પાર્ટીના સાંસદ અને પક્ષ પ્રમુખ ડૉ. સ્વામીએ પ્રવચન આપ્યું હતું.

તેમણે કહ્યું હતું કે ૨જી સ્પેકટ્રમ ટેલિકોમ કૌભાંડમાં પૂર્વ કેન્દ્રીય મંત્રી રાજાએ તેમણે અગાઉથી નક્કી કર્યા મુજબની બે કંપનીઓને લાયસન્સ આપ્યા હતા. જેમણે ૮ ગણી રકમ લઈને બે વિદેશી કંપનીઓને આ લાઇસન્સ વેચી નાંખ્યાં છે. જેના કારણે રાષ્ટ્રિય સુરક્ષાનો પ્રશ્ન ઉભો થયો છે. 

ડૉ.સ્વામીના કહેવા મુજબ સીએજીએ એવી જાહેરાત કરી છે કે જો લિલામ કરીને આ લાઇસન્સ અપાયા હોત તો રૂ.૧.૭૬ લાખ કરોડ જેટલી રકમ મળી શકી હોત એટલે કે આટલી મોટી રકમથી તો દેશની ત્રણ ગણી ખાધ ભરપાઈ કરી શકાય તેમ છે. હવે કૌભાંડમાં આંતરરાષ્ટ્રિય ધોરણો મુજબ ૩૫ ટકા લેખે કમિશન મળે છે અને એ પ્રમાણે ૬૦ હજાર કરોડ કમિશન પેટે મેળવાયા છે. જેમાંથી પૂર્વ કેન્દ્રિય મંત્રી રાજાને ૧૦ ટકા લેખે ૬ હજાર કરોડ મળ્યાં છે.

કરુણાનિધિને ૧૮ હજાર કરોડ અને સોનિયા ગાંધીને ૩૬ કરોડ મળ્યાં છે. સોનિયાએ આ રકમ પૈકીના ૧૮-૧૮ હજાર કરોડ રૂપિયા તેમની વિદેશમાં રહેતી બે બહેનોને મોકલાવી આપ્યાં છે. જોકે આવા ટ્રાન્ઝેક્શનની નોંધ અમેરિકા દ્વારા રખાતી હોવાથી ડૉ.સ્વામીએ તેની વિગતો અમેરિકા પાસેથી મંગાવી છે. જે મળી ગયા પછી તેઓ આગળની કાર્યવાહી હાથ ધરશે. ડૉ.સ્વામીએ કહ્યું હતું કે તેમણે અત્યારે સુપ્રીમ કોર્ટમાં જે કેસ કર્યો છે. તેમાં રાજાના નામને સામેલ કર્યો છે. 

હવે અમેરિકા પાસેથી મંગાવેલી વિગતો મળી ગયા પછી તેઓ કેસમાં સોનિયા અને કરુણાનિધિના નામો દાખલ કરશે. સુપ્રીમ કોર્ટમાં તેમણે પોતે પબ્લિક પ્રોસિક્યુટરની હેસિયતથી ઉપસ્થિત થવાની માગણી કરી છે. જે સ્વીકારાઈ છે એટલે તેઓ કોર્ટમાં આ બાબતે સંડોવાયેલાઓને સજા મળે તેવા પ્રયત્ન કરશે.