રોબોટ બાળકોને ભણાવશે

રોબોટ અને બાળકોને સાંકળતા નવા અભ્યાસે સૂચવ્યું છે કે એક દિવસ રોબોટ કલાસરૂમમાં બાળકોને ભણાવવામાં મદદ કરશે.

યુનિવર્સિટી ઓફ કેલિફોર્નિયા (યુસી), સાન ડિયોગોના સંશોધકોએ વિકસાવેલો રોબોટ એવું દર્શાવી ચૂકયો છે કે બાળકો કેટલી સારી રીતે શબ્દો શીખી શકે છે તેમાં તે નોંધપાત્ર સુધારો કરી શકે છે. ‘લાઈવ સાયન્સ’ના અહેવાલ અનુસાર સંશોધકો હવે આ રોબોટની નવી આવૃત્તિ વિકસાવી રહ્યા છે, જે કલાસરૂમમાં ફરી શકશે તેવું તેઓનું કહેવું છે.

યુસીના મશીન પર્સેપ્શન લેબોરેટરીના ડિરેક્ટર જેવિયર મોવેલન જ્યારે રોબોટને લગતા સંશોધન માટે જાપાનમાં હતા અને તેમનાં બાળકો ચાઈલ્ડ કેર સેન્ટરમાં હતાં ત્યારે તેમને રુબી નામનો રોબોટ બનાવવાનો આઇડિયા આવ્યો હતો. મોવેલન અને તેમના સાથીઓએ ૨૦૦૪માં રુબી પર કામ કરવાનું શરૂ કર્યું હતું. તે લગભગ ૨.૫ ફીટ ઊંચો, બાળકોનાં કદ જેટલો જ છે અને તે ઓછો ડરામણો છે તથા વાતચીત સુધારે છે.

રુબીની છાતીમાં વીડિયો સ્ક્રીન છે અને તેના માથામાં કેમેરા, માઈક્રોફોન, ઓડિયો સ્પીકર્સ તથા પ્લાસ્ટિકની વિશાળ આંખો છે. સંશોધકોએ ૧૮ થી ૨૪ મહિનાનાં નવજાત બાળકો સાથે કામ કરી શકે તેવો રુબી રોબોટ બનાવ્યો હતો. પરંતુ પહેલા જ પ્રયોગમાં માત્ર બે કલાકમાં બાળકોએ તેને સંપૂર્ણપણે તોડી નાખ્યો હતો. આથી વિજ્ઞાનીઓએ કોઈપણ નુકસાનને શોધવા રુબીમાં સેન્સર્સ મૂક્યા હતા. તેની સામે જોખમ હોય ત્યારે તે રડવા લાગે છે.

૧૨ સપ્તાહ રોબોટ સાથે રહ્યા બાદ રુબીએ બાળકોને શીખવાડેલા ૧૦ શબ્દોનું તેઓનું જ્ઞાન નોંધપાત્ર પ્રમાણમાં સુધર્યું હતું, જ્યારે રોબોટે તેઓને ન શીખવાડેલા ૧૦ શબ્દોના તેઓનાં જ્ઞાનમાં કોઈ સુધારો થયો ન હતો.