બેટ દ્વારકાને ગળી રહેલો દરિયો, હનુમાન દાંડી સુધી પહોંચ્યું પાણી

- દરિયાના મોજાઓની થપાટોથી કાંઠાનું મોટા પાયે ધોવાણ : સો વર્ષ જૂના સ્મશાનને પણ ભારે નુકસાન

સમુદ્રની વચ્ચે આવેલા બેટ દ્વારકાના કાંઠાઓનું મોટા પાયે ધોવાણ થઇ રહ્યું હોય દરિયો ધીમે ધીમે બેટને ગળી રહ્યો હોવાની સ્થિતિનું નિર્માણ થયું છે. અહીં આવેલાં સો વર્ષ પુરાણા હિન્દુઓનાં સ્મશાનનું પણ ધોવાણ થયું છે. જ્યારે દરિયાનું પાણી છેક હનુમાન દાંડી જતાં રસ્તા સુધી પહોચી ગયું છે. કાંઠાઓનાં ધોવાણની પ્રક્રિયાને ચિંતાજનક ગણાવવામાં આવી છે.

ભાજપ કિસાન મોરચા દ્વારા આ અંગે ઉચ્ચકક્ષાએ કરવામાં આવેલી રજુઆતમાં જણાવવામાં આવ્યું છેકે, ચારે બાજુ સમુદ્રથી ધેરાયેલા આ ટાપુનું ઐતિહાસિક અને ધાર્મિક મહત્વ આવેલું છે. બેટ દ્વારકા પાંચ હજાર વર્ષ પહેલાની મોક્ષપુરી તરીકે જાણીતું છે. અહીં ભગવાન શ્રીકૃષ્ણનો રાણીવાસ હતો જ્યારે અહીંનું સ્મશાન જાગતું સ્મશાન તરીકે ઓળખાય છે યોગ્ય જાળવણીના અભાવે દરિયાનાં મોજાની થપાટોથી કાંઠાઓનું ધોવાણ થઇ રહ્યું છે. જેની સાથે આ સ્મશાન પણ ખંઢેરમાં ફેરવાઇ ગયું છે. 

ચારે તરફ કાંઠાઓનું ધોવાણ સ્પષ્ટ જણાઇ રહ્યું છે. ત્યારે દરિયાને આગળ વધતો અટકાવવામાં નહીં આવે તો તે ધીમે ધીમે આખા ટાપુને ગળી જવાની દહેશત વ્યક્ત કરવામાં આવી છે. બેટમાં જ સુપ્રસિધ્ધ હનુમાન દાંડી મંદિર પણ આવેલું છે. જ્યાં માર્ગમાં કાચા પુલ પાસે થતાં ધોવાણને કારણે દરિયાનું પાણી મંદિરે જવાના રસ્તા પર આવી ગયું છે. 

રણમાંથી પણ દરિયાના પાણી ટાપુમાં અંદર સુધી ઘુસી રહ્યા છે. ત્યારે આ ઐતિહાસિક અને ધાર્મિક મહત્વ ધરાવતા ટાપુને બચાવવા કાંઠાના ધોવાણને અટકાવવા તાકીદે પગલાં લેવાની માગણી કરવામાં આવી છે.