ગંભીર બીમારી માટે સોયાબીન અને કિસમીસ રામબાણ ઇલાજ



એક દિવસમાં એક મુઠ્ઠી કિસમીસ અને સોયાબીનને આહારનો હિસ્સો બનાવવામાં આવે તો બ્લડપ્રેશરથી બચી શકાય છે. હૃદયની બીમારી માટે બ્લડપ્રેશર મુખ્ય કારણ છે. અમેરિકામાં હૃદય રોગ પર પર થયેલા એક મહત્વપૂર્ણ સંમેલનમાં રજૂ કરાયેલા અધ્યયનોમાં આ વાતનો ઉલ્લેખ કરાયો છે. અમેરિકન કોલજ ઓફ કાર્ડીયોલોજી કોન્ફરન્સમાં રજૂ કરાયેલા આ અધ્યયનોમાંથી એકમાં જણાવ્યા મુજબ દિવસમાં ત્રણવાર એક મુઠ્ઠી કિસમીસ ચાવી જવાથી બ્લડપ્રેશરમાં ઘટાડો જોવાયો છે.

નિયમિત કિસમીસ આરોગવાથી બ્લડપ્રેશરમાં ઘટાડો

બ્લડપ્રેશર પર કિસમીસની અસરના આ પહેલાં પરિક્ષણમાં જેનું બ્લડપ્રેશર સામાન્યથી ઉંચું હોય તેવા 46 લોકો પસંદ કરાયા હતાં, અને તેને હાઇબ્લડ પ્રેશર થવાનું જોખમ પણ હતું. આ લોકોનું બ્લડપ્રેશર 120-80 થી 139-89 માપવામાં આવ્યું હતું. જે સામાન્યથી થોડું વધુ હતું. આ લોકોના આહારમાં નિયમિત રીતે કિસમીસનો સમાવેશ કરાતા તેના બ્લડપ્રેશરમાં 12 સપ્તાહમાં ઘટાડો થયો હતો. તેમજ આ લોકોનું બ્લડપ્રેશર પણ સામાન્ય થઇ ગયું હતું.

સામાન્યથી વધી રહેલા બ્લડપ્રેશરને ઘટાડવામાં કિસમીસ કેવી રીતે સફળ થઇ શકે તે અંગે સંશોધકો હાલ ચોક્કસ રીતે જણાવી શક્તા નથી. પરંતું સંશોધક માને છે કે કિસમીસમાં પોટેશિયમ હોવાથી તે બ્લડપ્રેશરને ઘટાડવામાં મદદરૂપ થાય છે.

જ્યારે એક અન્ય અધ્યયન અનુસાર સોયાબીનને આહારનો નિયમિત હિસ્સો બનાવવાથી પણ બ્લડપ્રેશરમાં ઘટાડો કરવામાં મદદ મળે છે. 18-30 વર્ષના 5,100 શ્વેત અને આફ્રિકી અમેરિકી લોકો પર કરાયેલા અધ્યયન મુજબ પ્રતિદિન સોયાબીન, પનીર,મગફળી અને ગ્રીન ટી ને ભોજનનો ભાગ બનાવવાથી લોકોના બ્લડપ્રેશરમાં ઘટાડો થયો છે.