પાક.ના જવાનોની વધુ એક હેવાનિયત વીડિયો સ્વરૂપે પ્રગટ થઈ

- વીડિયો ફેસબૂક પર અપલોડ કરાયો

- આંખે પાટા બાંધી ચાર પુરૂષોને ઢોર માર મારતા દર્શાવતો વીડિયો


પાકિસ્તાનના રેન્જર્સ દ્વારા કરાચીમાં એક યુવકને જાહેરમાં ગોળી મારીને પતાવી દેવાની ઘટના હજુ તાજી જ છે ત્યાં પાકિસ્તાનના સંરક્ષણ દળના જવાનો દ્વારા આંખે પાટા બાંધેલ ચાર વ્યક્તિઓને ઢોર માર મારવાનો વીડિયો જાહેરમાં આવતા પાકિસ્તાનના અર્ધલશ્કરી દળોની હેવાનિયતનો વધુ એક પુરાવો સામે આવ્યો છે.

આ નવો વીડિયો ફેસબૂક જેવી સોશિયલ મીડિયા સાઈટ પર આ સપ્તાહે અપલોડ કરવામાં આવ્યો હતો જેમાં આંખે પાટા બાંધેલા ચાર લોકોને ઢોર માર મારતા પાકિસ્તાનના અર્ધલશ્કરી દળોના જવાનોને બતાવવામાં આવ્યા હતા.

આ અંગેના અખબારી અહેવાલોમાં એમપણ જણાવવામાં આવ્યું હતું કે આ વીડિયોમાં ઢોરમારને કારણે ચીસો પાડી રહેલા વ્યક્તિઓનો અવાજ પણ સ્પષ્ટ સંભળાતો હતો અને તેમને માર મારીને વિકૃત આનંદ લઈ રહેલા સુરક્ષાદળના જવાનો અટ્ટહાસ્ય કરી રહ્યા હતા.