સુખી લગ્નજીવન માટે પત્નીની ઊંઘ મહત્વની

 

શું તમારી પત્નીને ઊંઘની સમસ્યાઓ છે ? તો સાવધાન, એ સમસ્યાઓ તમારા લગ્નને બગાડી શકે છે તેવું વિજ્ઞાનીઓનું કહેવું છે. અમેરિકામાંની યુનિવર્સિટી ઓફ પિટ્સબર્ગ સ્કૂલ ઓફ મેડિસિનના મનોચિકિત્સકોને જણાયું હતું કે સ્ત્રીને જ્યારે ઊંઘવામાં મુશ્કેલી પડે ત્યારે તે અને તેનો સાથી બીજા દિવસે ઝઘડે તેવી શક્યતા વધારે છે. પરંતુ પુરુષ જ્યારે આખી રાત જાગતો રહે ત્યારે ઝઘડામાં કોઇ વધારો થતો નથી.

અભ્યાસનું નેતૃત્વ કરનાર પ્રોફેસર વેન્ડી ટ્રોકસેલે કહ્યું હતું, ‘અમને જણાયું હતું કે પત્નીની ઊંઘની સમસ્યાઓ બીજે દિવસે તેની પોતાની અને તેના સાથીની દાંપત્યજીવનની કામગીરીને અસર કરે છે અને આ અસરો ડિપ્રેશનનાં લક્ષણોથી અલગ હોય છે. જે પત્નીઓને આગલી રીતે ઊંઘવામાં લાંબો સમય લાગ્યો હતો તેઓએ બીજા દિવસે લગ્નજીવનની નબળી કામગીરી કરી હતી અને તેઓના પતિઓની કામગીરી પણ નબળી જ હતી.’

અગાઉના અભ્યાસોમાં સંશોધકોને જણાયું હતું કે જો પથારીમાં પતિ કે સાથીની સ્થિર હાજરી હોય તો સ્ત્રીઓ વધુ સારી રીતે ઊંઘી જાય છે. પરંતુ આ સપ્તાહે મિનીઆપોલિસમાં એસોસિયેટેડ પ્રોફેશનલ સ્લીપ સોસાયટીઝની બેઠકમાં રજુ કરાયેલા નવા સંશોધનમાં ડૉ. ટ્રોકસેલે ઊંઘની લંબાઇ અને દાંપત્યજીવનની દૈનિક આંતરક્રિયાઓ વચ્ચેની કડીઓને તપાસી હતી.

ડૉ. ટ્રોકસેલ અને તેમની ટીમે ૩૫ તંદુરસ્ત પરિણીત યુગલોનો અભ્યાસ કર્યો હતો. આ પૈકીના મોટાભાગનાં યુગલો ૩૦થી ૩૯ વર્ષનાં હતાં અને તેઓ શારીરિક કે માનસિક આરોગ્ય સમસ્યાઓનો કોઇ ઈતિહાસ ધરાવતા ન હતા.

અભ્યાસનાં પરિણામોએ દર્શાવ્યું હતું કે સ્ત્રીઓને ઊંઘવામાં લાંબો સમય લાગે તો બીજા દિવસે યુગલ સંબંધમાંની સમસ્યાઓ જણાવે તેવી શક્યતા વધે છે. જોકે પુરુષની ઊંઘની બીજા દિવસના તેના કે તેની સાથીના વ્યવહાર પર કોઇ અસર થતી નથી. સંશોધકો અનુસાર પરિણામો દર્શાવે છે કે અનિદ્રા જેવા ઊંઘના વિકારો જે-તે વ્યક્તિ કરતાં વધુ લોકોને અસર કરી શકે છે.