આખરે ગિરનાર રોપ-વે પ્રોજેક્ટને મંજૂરી

- પર્યાવરણ મંત્રાલયે સોમવારે સવારે મંજૂરી આપી

- સૌપ્રથમ 1983માં આ પ્રોજેક્ટની દરખાસ્ત કરવામાં આવી હતી

- ગુજરાત કોંગ્રેસના પ્રતિનિધિમંડળ સાથેની બેઠક પછી કેન્દ્રીય પર્યાવરણમંત્રીએ લીધેલો નિર્ણય

જેની ઘણા લાંબા સમયથી રાહ જોવાતી હતી તે ગિરનાર રોપ-વે પ્રોજેક્ટને આજે કેન્દ્રીય પર્યાવરણ મંત્રાલય દ્વારા મંજૂરી આપી દેવામાં આવી છે. ગુજરાત કોંગ્રેસ પ્રદેશ સમિતિના પ્રમુખ સિદ્ધાર્થ પટેલ સહિતના પ્રતિનિધિમંડળ સાથે સોમવારે સવારે યોજાયેલી બેઠક પછી આ નિર્ણય જાહેર કરવામાં આવ્યો છે.

ગુજરાત પ્રદેશ કોંગ્રેસ સમિતિના પ્રમુખ સિદ્ધાર્થ પટેલ અને જૂનાગઢના મેયર સહિતના પ્રતિનિધિઓની રજૂઆતો સાંભળ્યા પછી કેન્દ્રીય પર્યાવરણ મંત્રી જયરામ રમેશે આખરે સોમવારે સવારે ગુજરાતના હિત માટે ગિરનાર રોપ-વે પ્રોજેક્ટને મંજૂરી આપી હતી. આ અંગે રાજ્ય સરકારને પણ સત્તાવાર જાણ કરવામાં આવશે.

આ અંગે સિદ્ધાર્થ પટેલે માધ્યમોને નવી દિલ્હીથી જણાવ્યું હતું કે, આજે સવારે કેન્દ્રીય પર્યાવરણ મંત્રાલય દ્વારા ગિરનાર રોપ-વે પ્રોજેક્ટને મંજૂરી આપી દેવામાં આવી હતી. મંત્રાલયની વેબસાઇટ પર પણ આ નિર્ણય જાહેર કરવામાં આવશે અને ટૂંક સમયમાં ગુજરાત સરકારને પણ તેની વિધિવત જાણ કરવામાં આવશે.

તેમણે જણાવ્યું હતું કે, ગુજરાત અને ખાસ કરીને જૂનાગઢના હિતને ધ્યાનમાં રાખીને આ પ્રોજેક્ટને મંજૂરી આપવા માટે રજૂઆત કરવામાં આવી હતી. મંજૂરી આપી દીધા પછી પણ કેન્દ્રીય મંત્રી ફરી એકવાર ગીરનારની મુલાકાત લેશે.

ગુજરાત પ્રદેશ કોંગ્રેસ સમિતિ દ્વારા કેન્દ્ર સરકારના આ નિર્ણયને આવકારવામાં આવ્યો છે.