જાજરમાન 'વર્લ્ડકપ'ને વડોદરાવાસીઓએ વધાવ્યો

- બે વર્લ્ડ કપમાં રમી ચૂકેલ અંશુમન ગાયકવાડે વિશેષ હાજરી આપી

આઇસીસી ક્રિકેટ વર્લ્ડકપ વર્ષ ૨૦૧૧ની જાજરમાન ટ્રોફી આજે અહીં વડોદરાની હોટેલ વેલકમ ખાતે રિલાયન્સ કોમ્યુનિકેશન દ્વારા એક નાનકડાં પરંતુ શાનદાર સમારંભમાં પ્રદર્શિત કરાઇ હતી. આ પ્રસંગે ભૂતકાળમાં બે ક્રિકેટ વર્લ્ડ કપમાં રમી ચૂકેલ અંશુમન ગાયકવાડે વિશેષ હાજરી આપી હતી.

કાર્યક્રમમાં આરકોમના ગુજરાત- રાજસ્થાન હબના હેડ વિનય ચાંદોક, સર્કલ હેડ શિરિષ ગુપ્તા હાજર રહ્યાં હતા. આગામી તા. ૧૯ ફ્બ્રુઆરીથી શરૂ થતા આઇસીસી ક્રિકેટ વર્લ્ડકપની ટ્રોફી અહીં હોટેલ વેલકમ ખાતે પ્રદર્શિત કરવામા આવી હતી.

એક નાનકડાં પરંતુ ભવ્ય કાર્યક્રમમાં વર્લ્ડકપ ટ્રોફી પ્રદર્શિત કરતા અગાઉ લેઝર શો યોજવામાં આવ્યો હતો. વડોદરાના વિશ્વવિખ્યાત પૂર્વ ક્રિકેટર અને ૧૯૭૫ તેમજ ૧૯૭૯ ક્રિકેટ વર્લ્ડકપમાં રમી ચૂકેલ અંશુમન ગાયકવાડની હાજરીમાં વર્લ્ડકપને પ્રદર્શિત કરવામા આવ્યો ત્યારે ઉપસ્થિત સૌએ વિશ્વકપને તાળીઓના ગડગડાટથી વધાવી લીધો હતો.

આ પ્રસંગે અંશુમન ગાયકવાડે જણાવ્યું હતું કે સમગ્ર ગુજરાતમાં વડોદરામાં વર્લ્ડકપ પ્રદર્શિત કરવામા આવ્યો એ વડોદરા માટે ગૌરવની વાત છે. નજીકના દિવસોમાં રમાનાર વિશ્વકપ અને તેમના સમયમાં રમાયેલ વિશ્વકપ અંગે ચર્ચા કરતા અંશુમને જણાવ્યું કે તેમના સમયમાં ટીમના લગભગ બધાં ખેલાડીઓ બોલિંગ-બેટિંગ બન્ને કરતા હતાં.

જ્યારે હવે નિષ્ણાતોનો જમાનો આવી ગયો છે. બેટધર બેટિંગ કરે છે, બોલર બોલિંગ કરે છે. એક સવાલના જવાબમાં તેમણે કહ્યું કે વિશ્વકપની ટીમમા માત્ર એક જ વિકેટકીપર રખાયો એ મોટું જોખમ લેવા જેવી વાત છે. કેમ કે ટીમમાં ધોની સિવાય બીજો કોઇ અસરકારક વિકેટકીપર નથી. આવા સમયે જો ધોનીને ઇજા થાય તો મોટી સમસ્યા ઊભી થઇ શકે છે. અંતમાં તેમણે ભારત વર્લ્ડકપ જીતે એવી શુભેચ્છા પાઠવી હતી.