હાથમાં પાણી લઈને સંકલ્પ કેમ કરવામાં આવે છે ?

આપણે જોઈએ છીએ કે અનેકવાર સંકલ્પ લેતી વખતે આપણે હાથમાં પાણી લઈએ છીએ. અનેક વાર સત્ય બોલાવવા માટે હાથમાં ગંગાજળ રાખવામાં આવે છે. પૂજાપાઠ, કર્મકાંડનો સંકલ્પ હાથમાં પાણી લઈને કરવામાં આવે છે. તો પ્રશ્ન થાય કે સંકલ્પ લેતી વખતે હાથમાં પાણી કેમ લેવામાં આવે છે ? પાણી વીના જો સંકલ્પ લેવામાં આવે તો તેને અધૂરો કેમ માનવામાં આવે છે? પાણીમાં એવું તો શું છે જેનું આટલું મહત્વ છે? એવા અનેક સવાલો આપણા મનમાં આવ્યા કરે છે.

વાસ્તવમાં પાણીને અનેક ધર્મોમાં સૌથી વધારે પવિત્ર માનવામાં આવે છે. જળ અનેક ધર્મોના દેવતા છે. વેદોમાં જળને ખૂબ મહત્વપૂર્ણ માનવામાં આવે છે. જળથી જ સમગ્ર સૃષ્ટિનો જન્મ થયો છે. આ કારણે જળને સૌથી વધુ પવિત્ર માનવામાં આવે છે. આપણા મગજમાં 80 ટકા પાણી છે. જ્યારે પણ આપણે કોઈ કાર્ય કરીએ છીએ ત્યારે બુદ્ધિને જાગૃત રાખીએ છીએ. પાણીને હાથમાં લેવાનો મતલબ છે સ્વયંની કસમ લેવી. સ્વયંને સાક્ષી રાખીને કોઈ પણ કાર્ય કરવું.


જળને હાથમાં લેવાનું કારણ છે સૃષ્ટિના પંચ મહાભૂતોને ( અગ્નિ, પૃથ્વી, આકાશ, વાયુ અને જળ) માં રહેલા ભગવાન ગણપતિ જળ તત્વના અધિપતિ છે. તેમની પ્રાર્થના કરવાથી મનોવાંચ્છિત ફળ મળે છે. આ કારણે જળ હાથમાં લઈને સંકલ્પ કરવામાં આવે છે.