હવે જીમેઇલ પર અણગમતા મેઇલ્સને કરી દો ‘મ્યુટ’

લોકોને ફોરવર્ડેડ ઇમેઇલ્સ વાંચવાનો અને ગામ આખાને એ ઇમેઇલ્સ ફોરવર્ડ કરવાનો એવો ધખારો હોય છે કે આપણું ઇન બોક્સ લિટરલી ભંગારની દુકાન જેવું થઇ જાય. આનો એક ઉપાય છે કે એવા મેઇલ્સને ‘સ્પામ’ તરીકે જાહેર કરી દઇને ઇનબોક્સમાંથી નાત બહાર મૂકવા, જેથી તે સીધા જ સ્પામના બોક્સમાં જઇને બેસે અને તમે તેને ડિલિટ કરવાની તસ્દી ન લો તો ત્રીસ દિવસ પછી આપોઆપ ડિલિટ થઇ જાય.

બીજા ઉપાય તરીકે જીમેઇલમાં દસથી વધુ વ્યક્તિઓને એક્સાથે મોકલાયેલા ઇમેઇલ્સને તમારા ઇનબોક્સમાં આવતા રોકવા માટે ‘મ્યુટ’ની સુવિધા શરૂ કરી હતી. જે ઇનબોક્સની ઉપર આપેલા ‘મોર એકશન્સ’ના બટન પરથી જઇને શરૂ શકાય છે. હવે ગયા અઠવાડિયે આ સુવિધાને ગૂગલે વધુ સ્માર્ટ બનાવી છે.

‘સ્માર્ટ મ્યુટ’ નામની આ સુવિધા શરૂ કરવા માટે જીમેઇલની ઉપરની જમણી બાજુએ આપેલા સેટિંગ બટન પર ક્લિક કરીને લેબ્સમાં જાઓ. એ લિસ્ટમાં સ્માર્ટ મ્યુટ શોધીને તેને ‘એનેબલ’ કરી દો. હા, આ અગાઉ મ્યુટનો ઓપ્શન શરૂ કરી રાખજો.‘