જાપાનમાં ચોખામાંથી બ્રેડ બનાવતા કૂકરની ભારે માગ

કંપનીએ નવા ઓર્ડર લેવાનું બંધ કર્યું

જાપાની ઈલેકટ્રોનિકસ કંપની સાન્યોએ આજે જણાવ્યું છે કે ચોખાને બ્રેડમાં ફેરવતા તેના નવા કૂકરની વિશાળ માગને પહોંચી વળવા તે અસમર્થ હોવાથી તેને તેનું વેચાણ કામચલાઉપણે અટકાવવાની ફરજ પડી છે.

કંપનીએ જણાવ્યું હતું કે, તે ૧ ડિસેમ્બરથી તેના પ૦,૦૦૦ યેન (૬૦૦ ડોલર)ની કિંમતના ગોપાન રાઈસ બ્રેડ કૂકરના ઓર્ડર લેવાનું બંધ કરશે. તે ચીનમાંના તેના પ્લાન્ટમાં તેની ઉત્પાદન ક્ષમતા વધારવા માગે છે. તે એપ્રિલમાં ઓર્ડર લેવાનું પુન: શરૂ કરે તેવી શક્યતા છે. તેનું કહેવું છે કે ગોપાન વિશ્વનું પ્રથમ કૂકર છે જે ચોખાને દળીને પાઉડર અને બ્રેડ બનાવે છે.

કંપની માર્ચ, ર૦૧૧ના અંત સુધીમાં પ૮,૦૦૦ કૂકર વેચવાની અપેક્ષા રાખતી હતી, પરંતુ તેને ૧૧ નવેમ્બર સુધીમાં આનાથી વધુ ઓર્ડર મળ્યા છે. સાન્યોનું કહેવું છે કે નવેમ્બરના અંત સુધીમાં ઓર્ડર આપનાર ગ્રાહકોને તે કૂકરની ડિલિવરી કરવાની યોજના ધરાવે છે, પરંતુ તેમાં માર્ચ સુધીનો વિલંબ થઈ શકે છે.