બચત ખાતામાં બેલેન્સ એક લાખથી ઓછુ થશે તો નહીં મળે વધુ વ્યાજ

- RBIની સ્પષ્ટતા
- એક દિવસ માટે પણ ઓછુ થશે તો નહીં મળે વધુ વ્યાજ
- વ્યાજની દૈનિક ધોરણે થશે ગણતરી
- કેટલીક બેંકોએ ગ્રાહકોને આકર્ષવા વ્યાજદર વધારી 6થી 7 ટકા કરી દીધો હતો
- વ્યાજની ગણતરી દૈનિક ધોરણે થશે

બચત ખાતા પર વ્યાજ દરથી રિઝર્વ બેંક ઓફ ઈન્ડિયાએ નિયંત્રણો હટાવી લીધા બાદ અનેક બેંકોએ ગ્રાહકોને આકર્ષવા માટે આ વ્યાજદર વધારીને ૬થી ૭ ટકા કરી દીધો છે. જો કે આ અંગે રિઝર્વ બેંકે સ્પષ્ટતા જાહેર કરી છે.આ સ્પષ્ટતા મુજબ એક લાખથી ઉપરની બેલેન્સ પર જ બેંકના બોર્ડે નક્કી કરેલો વધારાનો વ્યાજ દર આપવામાં આવશે.

આ વ્યાજની ગણતરી દૈનિક ધોરણે થશે. એટલે કે રોજ સાંજે ખાતામાં જે રકમ હશે તેના પર વધારાના વ્યાજદર મુજબના વ્યાજની ગણતરી કરી દેવામાં આવશે. જો એક દિવસ માટે પણ બચત ખાતામાં બેલેન્સ એક લાખ રૂપિયાથી ઓછી થઈ ગઈ તો એ દિવસે નિયંત્રિત એટલે કે સાડા ચાર ટકાના દરે જ વ્યાજ મળશે.

ઉલ્લેખનીય છે કે કેટલીક ખાનગી બેંકોએ રિઝર્વ બેંકે બચતના દર અનિયંત્રિત કર્યા બાદ ગ્રાહકોને આકર્ષવા માટે બચત ખાતા પર વ્યાજના દર વધારી દીધા છે. બીજી તરફ સ્ટેટ બેંક ઓફ ઈન્ડિયાએ વ્યાજદરમાં વધારાની સ્પષ્ટ ના પાડી દીધી છે. સ્ટેટ બેંકની નીતિને અન્ય રાષ્ટ્રીયકૃત બેંકો પણ અનુસરી છે અને તેમણે પણ બચત ખાતા પર વ્યાજનો દર વધાર્યો નથી.