અત્યારે ઇન્ટરનેટ પર એવાં સર્વેક્ષણ અને તારણો ફરતાં થઈ ગયાં છે કે ગૂગલની નવી પ્રાઇવસી પોલિસી જોયા પછી ગૂગલના હાલના ૬૬ ટકા વપરાશકારોએ નક્કી કરી લીધું છે કે તેઓ ગૂગલને બાયબાય કરી દેશે!
ઇન્ટરનેટ જાણે હમણાં ઇન્ડિયા હોય એવું લાગે છે - રોજેરોજ વિવાદો! સોપા અને પીપાના મુદ્દે ઇન્ટરનેટની દિગ્ગજ કંપનીઓ અને યુએસની સરકાર આમને સામને છે ત્યાં ગયા અઠવાડિયે ગૂગલે તેની નવી પ્રાઇવસી પોલિસીની જાહેરાત કરીને વળી એક નવું ઊંબાડિયું ઊભું કર્યું. વિવાદ એટલો મોટો છે કે ઇન્ટરનેટ પર એવા (અનસાયિન્ટફિક) સર્વેક્ષણ અને તેનાં પરિણામો ફરતાં થઈ ગયાં કે ગૂગલની નવી પ્રાઇવસી પોલિસી જોયા પછી ગૂગલના હાલના ૬૬ ટકા વપરાશકારોએ નક્કી કરી લીધું છે કે તેઓ ગૂગલને બાયબાય કરી દેશે!
આખરે છે શું ગૂગલની આ નવી પોલિસીમાં, અને જો તમે ગૂગલની વિવિધ સેવાનો ઉપયોગ કરતા હો (બીજા ગ્રહ પર રહેતા હો તો જુદી વાત છે!) તો મને અને તમને તેની શી અસર થશે? પહેલી વાત તો એ કે ગૂગલે હજી ફકત જાહેરાત કરી છે, તેની નવી પોલિસી પહેલી માર્ચથી અમલમાં આવશે. ગૂગલના ઓફિશિયલ બ્લોગ પર જણાવ્યા મુજબ ગૂગલની અલગ અલગ પ્રોડકટ્સની લગભગ ૭૦ જેટલી પ્રાઇવસી પોલિસી હતી (જેને માટે લગભગ તમે અને હું, નવી સર્વિસમાં સાઇન અપ થતી વખતે આંખો મીંચીને ‘આઇ એક્સેપ્ટ’ કહીએ છીએ!).
હવે ગૂગલે આ બધીને સાંકળીને, માત્ર એક યુનિફોર્મ પોલિસી તૈયારી છે. એક પોલિસીનો મતલબ એ થયો કે હવે આ પ્રોડકટ્સ પણ એક થશે, જેથી, ફરી ગૂગલના કહેવા મુજબ આપણને સૌને ગૂગલની વિવિધ સેવાઓનો એક ‘બ્યુટીફૂલી સિમ્પલ, ઇન્ટ્યુઇટિવ યુઝર એક્સ્પીરીયન્સ’ મળી શકે. આનો સાદો અર્થ શું થયો? સમજવાની કોશિશ કરીએ.
અત્યાર સુધી ગૂગલની આ બધી પ્રોડકટ્સ અંતે ગૂગલની જ હોવા છતાં એકમેક સાથે સંપૂર્ણ રીતે સંકળાયેલી નહોતી. હવે બધી સર્વિસ એક બીજા સાથે પરફેક્ટ્લી સંકળાશે, મતલબ કે આપણે ગૂગલની અલગ અલગ સર્વિસ પર જે કંઈ ડેટા મૂકીએ છીએ તે બધો ડેટા ગૂગલની બધી સર્વિસ જોઈ શકશે અને તેમાંથી ગૂગલ પોતાની રીતે અર્થો તારવીને, આપણને ‘વધુ અનુકૂળ અને વધુ ઉપયોગી’ એવી સર્વિસ આપશે.
આનો અર્થ એવો પણ થયો કે જીમેઇલમાંના આપણા મેઇલ્સ, પિકાસામાંની આપણી તસવીરો, ગૂગલ પ્લસમાંના આપણા અપડેટ્સ, અન્ય લોકોએ આપણી સાથે શેર કરેલા ફોટોઝ, અપડેટ્સ, ગૂગલ મેપ્સ પરનાં આપણાં લોકેશન્સ, યુટ્યૂબ પરના આપણા વીડિયો, આપણે સાઇન ઇન થયા પછી જોયેલા વીડિયો... વગેરે વગેરે બધું ગૂગલ જોશે, તપાસશે, તેમાંથી આપણી પસંદ-નાપસંદ, આપણું કામ, આપણા વિચારો, મંતવ્યો વગેરે બધું એકમેક સાથે સાંકળશે અને તેના આધારે આપણને ‘વધુ સારી’ સેવા આપશે.
તમે કદાચ નોંધ્યું હશે કે ગૂગલ પ્લસમાં સાઇન ઇન થઈને તમે ગૂગલમાં સર્ચ કરશો તો એ સર્ચ રિઝલ્ટમાં ઇન્ટરનેટ પરના તમારા પોતાના ડેટા અને તમારા મિત્રોના ડેટામાંથી પણ સર્ચ કરીને તેનાં રિઝલ્ટ પણ તમારી સામે મૂકે છે! (વધુ જાણવા જુઓ www.google.com/insidesearch/plus.html ). જો બધું આટલું સારું જ હોય તો દુનિયા આખીમાં આટલો હોબાળો કેમ મચ્યો છે?
આ ‘વધુ અનુકૂળ, વધુ ઉપયોગી, વધુ સારી’ વગેરે વિશેષણો નોંધપાત્ર એટલા માટે છે કે આ બધું માત્ર આપણા માટે અનુકૂળ, ઉપયોગી અને સારું નથી. એ બધું ગૂગલને પણ લાગુ પડે છે! ગૂગલ આપણી પસંદ-નાપસંદ જાણીને તેના આધારે આપણને કઈ જાહેરાત વધુ અસર કરી શકશે તે જાણશે અને પછી વધુ ટાર્ગેટેડ, વધુ ઇફેક્ટિવ જાહેરાત, સર્ચ રિઝલ્ટ વગેરે આપણી સામે મૂકશે. તમને આ સામે કોઈ વાંધો ન હોય તો તો કોઈ વાંધો જ નથી, પણ ઘણાના મતે, ગૂગલ આ રીતે સવeજ્ઞાની બની જાય એ સ્થિતિ બરોબર નથી.
વાસ્તવમાં, ગૂગલ હવે સર્વજ્ઞાની બને છે એવું પણ નથી. અત્યાર સુધી આપણે સૌએ તેની પોલિસીઝ સ્વીકારીને આપણી બધી માહિતી સમજી વિચારીને કે ભોળપણમાં તેને ધરી જ દીધી છે. ગૂગલની દરેક સર્વિસ અલગ અલગ રીતે આપણી બધી વાત જાણી જ ચૂકી છે, ગૂગલ માત્ર એવી ચોખવટ કરે છે કે હવે અમે બધું એક સાથે જોવાના છીએ!
ગૂગલ એટલી સ્પષ્ટતા કરે છે કે નવી પોલિસી આવ્યા પછી પણ કેટલીક બાબતો યથાવત્ રહેશે, જેમ કે તમે ગૂગલ પરનો તમારો તમામ ડેટા પરત મેળવી શકો છો (આપણે આ વિશે અગાઉ વાત કરી ગયા છીએ). ગૂગલ કહે છે કે એ આપણી અંગત માહિતી કોઈને વેચશે નહીં કે કોર્ટ ઓર્ડર જેવા સંજોગો સિવાય કોઈને આપશે પણ નહીં. તમે શું માનો છો, ગૂગલ પર આવી રહેલાં આ નવાં પરિવર્તનો વિશે?
Comments
Post a Comment