બાળક તમારી વાત માને તે માટે...

 

દરેક માતાપિતા ઇચ્છે છે કે તેમનું બાળક પોતે કહે તે વાત માને. જોકે તેઓ એ ભૂલી જાય છે કે બાળક તેમની દરેક વાત માને તે માટે તેને વિશ્વાસમાં લેવું જરૂરી છે. ખાસ કરીને બાળકની વાત સાંભળવી વધારે અગત્યની છે, ત્યારે જ એ માતાપિતાની વાત સાંભળશે. જાણીએ, બાળક માતાપિતાની વાત સાંભળે તે માટે શું ધ્યાન રાખવું?

- બાળક શું કહેવા માગે છે, તે વાત પહેલાં ધ્યાનથી સાંભળીને જ તેને પ્રતિક્રિયા આપો.

- નવરાશના સમયમાં બાળક સાથે બેસો. એ જે કામ કરતું હોય તેમાં તેને પ્રોત્સાહિત કરો, માર્ગદર્શન આપો અને પ્રશંસા કરો.

- નાની નાની વાતમાં બાળકને ઠપકો ન આપો કે તેને ટોકો નહીં. આમ કરવાથી બાળક દૂર રહેશે અને એ જ કામ પહેલું કરશે જે કરવાની તમે ના કહી હશે.

- બાળકમાં સારી સંવાદિતા વિકસાવવા માટે માતાપિતાએ એની સાથે સારી રીતે વાતચીત કરવી જોઇએ. વાતચીત કરવાની શૈલી તેમના સ્વભાવને અસર કરે છે.

- હકારાત્મક વિચારસરણી વિકસાવો. કોઇ કામ કરવા માટે ના કહી દેવાને બદલે એને સમજાવો કે કેમ તે અમુક કામ ન કરી શકે? સમજાવવાથી તે તમારી વાત ચોક્કસ સાંભળશે.

- બાળકની કોઇની સાથે સરખામણી ન કરો અથવા તેની સાથે ગમે તેવા શબ્દો ન વાપરો.

- બાળક સાથે કરવામાં આવેલું ખોટું વર્તન તેના મન પર ગાઢ અસર કરે છે. તે લઘુતાગ્રંથિનો ભોગ બને છે અને આત્મવિશ્વાસ ઘટી જાય છે.

- ક્યારેય ભાઇ-બહેનોની સરખામણી અથવા પક્ષપાત ધરાવતું વર્તન ન કરો. બંનેને સમાન પ્રેમથી બોલાવો અને કવોલિટી સમય ફાળવો.

- બાળક સાથે બૂમબરાડા પાડીને વાત ન કરો. એનાથી બાળક પણ મોટા અવાજે બોલતાં શીખશે અને વાતવાતમાં દલીલ કરશે.

- બાળકને શિષ્ટાચાર શીખવો. તેને થેન્કયૂ, સોરી, પ્લીઝ જેવા શબ્દો યોગ્ય કામ કરે ત્યારે કહેતાં અને બોલતાં શીખવો.