ક્રેડિટ કાર્ડનો ઉપયોગ કરતા લોકો આ વાંચી લેજો

-ઉત્તર અમેરિકા સુધી આ હેકરોની પહોંચ મર્યાદિત
-છેતરપિંડીથી વ્યવહારો કરી શકાય તેટલા પૂરતી માહિતી ચોરી લેવાઇ

એક મોટી ક્રેડિટ કાર્ડ ચોરીમાં 15 લાખ જેટલા માસ્ટરકાર્ડ અને વિઝા એકાઉન્ટને હેક કરાયા હતા. આ ડેટા લીક ત્યારે સામે આવ્યું જ્યારે આ બંને કંપનીઓએ એ વાતને સ્પષ્ટ કરી હતી કે યુએસ કન્ઝ્યુમરના ક્રેડિટ કાર્ડ ડેટાની મોટી ચોરીમાં તપાસ થઇ રહી છે. પહેલાં એવું માનવામાં આવ્યું હતું કે એક કરોડ જેટલા ગ્રાહકોનો ડેટા ચોરાયો હતો.

આ બંને અગ્રણી વૈશ્વિક કાર્ડ પ્રોસેસર કંપનીઓએ જણાવ્યું હતું કે ચોરીનો આ કિસ્સો થર્ડ પાર્ટી વિક્રેતા ગ્લોબલ પેમેન્ટસમાંથી ઉભો થયો છે, નહીં કે તેમની પોતાની આંતરિક વ્યવસ્થામાંથી.

હેકરો દ્વારા 15 લાખ જેટલા નંબરોની નિકાસ થઇ હોય તેવું બની શકે છે, જેમની પહોંચ કંપનીની પેમેન્ટ પ્રોસેસિંગ સિસ્ટમ સુધી હતી, તેમ ગ્લોબલ પેમેન્ટસે એક યાદીમાં જણાવ્યું હતું. ગુનેગારો દ્વારા કાર્ડધારકોના નામ, સરનામા અને સોશિયલ સિક્યોરિટી નંબરો દ્વારા મેળવી શકાયા ન હતા. જો કે આ માહિતી વિના પણ કંપનીએ જણાવ્યું છે તે પ્રમાણે દરેક એકાઉન્ટમાંથી લીધેલો ડેટા છેતરપીંડી કરીને વ્યવહારો કરી શકાય તે માટે પુરતો છે, તેમ સમાચાર પત્ર ડેઇલી મેલના એક અહેવાલમાં જણાવાયું છે.

કંપનીએ જણાવ્યું હતું કે હેકરોની પહોંચ ઉત્તર અમેરિકા સુધી મર્યાદિત હતી.

ગ્લોબલ પેમેન્ટસે કહ્યું હતું કે ગ્રાહકોને તેમની કોઇ પણ ચિંતાના ઉકેલ માટે તેમના ઓનલાઇન ખાતા ચેક કરવા કે તેમની નાણાકીય સંસ્થાનો સંપર્ક સાધવા જણાવાયું છે.