સરલાની હ્રદયસ્પર્શી દાસ્તાન ભલભલાની આંખ ભીંજવી નાખશે

 

- અપહ્યત સરલા ૧૪ વર્ષે તેનાં માતા-પિતાને મળી

- ૧૩ વર્ષની વયે અપહ્યત થયેલી સરલા આજે ૨૭ વર્ષની થઈને પરત ફરી

- અપહરણકર્તા મહિલાએ સરલાને ૭૦૦૦માં વેચી દીધી હતી

બાળકોના અપહરણના કિસ્સાઓ જ્યારે ગંભીર રીતે વધી રહ્યા છે, ત્યારે અપહૃત સરલાની હૃદયદ્રાવક ઘટનાની આ વાત સમાજ માટે લાલબત્તી સમાન છે. ૧૯૯૮માં માત્ર ૧૩ વર્ષની કૂમળી ઉંમરે જેનું અપહરણ થઈ ગયું હતું, તે સરલા આજે ૧૪ વર્ષનો ‘અજ્ઞાતવાસ’ ભોગવી બાળકીમાંથી બે બાળકોની માતા બની ઘરે પરત આવી છે. આ ૨૭ વર્ષીય સ્ત્રીની આપવીતીની હૃદયસ્પર્શી દાસ્તાન ભલભલાની આંખ ભીંજવી નાખે તેવી છે.

અમદાવાદના ઓઢવ વિસ્તારમાં રહેતા બાબુભાઈ પરમારના પરિવારની ધો. ૬માં અભ્યાસ કરતી ૧૩ વર્ષીય સરલા ૨૮મી મે ૧૯૯૮ના રોજ લાપતા થઈ ગઈ હતી. આ અંગે સરલાના બંધ મિલ કામદાર પિતા બાબુભાઈએ ૩૧મી મેના રોજ ઓઢવ પોલીસ સ્ટેશનમાં ફરિયાદ પણ નોંધાવી હતી. અલબત્ત સમય વીતતો ગયો, પરંતુ સરલાનો કોઈ જ પતો નહીં મળતાં પરિવારજનો તેમની દીકરી કદાચ હયાત પણ નહીં હોય તેવી દુ:ખદ લાગણી સાથે સરલાને યાદ કરી જીવન વ્યતીત કરવા લાગ્યા.

બીજી તરફ બાળકી સરલાનું અપહરણ કરનાર બેબીબહેન નામની મહિલા સરલાને લઈ દિલ્હી પહોંચી ગઈ, જ્યાં તેણે બાળકી સરલાની સ્થિતિ દુ:ખદ બનાવી દીધી. એટલું જ નહીં બેબીબહેન સરલા પર શારીરિક અત્યાચાર પણ કરવા લાગી. અલબત્ત એક આધેડ વયના ઉત્તરપ્રદેશના ખેડૂત રામકિલારે જારવને સરલાની દયા આવી ગઈ.

જ્યારે તેણે બેબીબહેનને સરલા પર દયા કરવાની વિનંતી કરી ત્યારે પેલી અત્યાચારી મહિલાએ સંભળાવી દીધું કે, ‘દયા આવતી હોય તો તું આને R ૭૦૦૦ આપી લઈ જા અને રામકિલારેએ રૂપિયા ચૂકવી સરલાને છુટી કરી લીધી. બાદ તેને ઉત્તરપ્રદેશ લઈ જઈ તેની સાથે લગ્ન પણ કરી લીધાં.

તેના પરિવારને ૧૪ વર્ષ બાદ મળવા આવેલી સરલા માત્ર હિન્દી બોલે છે અને તેની માતૃભાષા ગુજરાતી પણ ભૂલી ગઈ છે. વૃદ્ધ માતા-પિતા મણિબહેન અને બાબુભાઈ સહિત પરિવારજનોએ સરલાનું સ્વાગત અશ્રુભીની આંખે કર્યું અને સરલા પણ ચોધાર આંસુ સાથે પરિવારજનોને મળી.

પરમાર પરિવાર હવે સરલાનાં બે બાળકો ૮ વર્ષીય જયોતી અને પાંચ વર્ષના સોનુને મળવાની રાહ જુએ છે. જો કે નિર્દોષ બાળકોનું અપહરણ કરતી બેબીબહેનના એક સ્થાનિક સંબંધી પાસેથી મળેલી તે નરાધમ મહિલાની તસવીર લઈ પરમાર પરિવાર તેની ત્વરિત ધરપકડ અને કડક સજા થાય તેવી લાગણી વ્યક્ત કરી રહ્યો છે.