હોટ ગરમીમાં વગર એ.સી.એ ઠંડુ ઘર, હવે છે પોસિબલ

 

- વધતી ગરમીમાં એ.સી. વગર પણ ઘરને ઠંડુ રાખી શકાય

- એન્વાયરન્મેન્ટ એફિશિયન્સી બિલ્ડિંગની રચના કરી કુદરતી રીતે ઘરને ઠંડું રાખી શકાય

- પેઈન્ટ સિલેકશન, ઈનડોર પ્લાન્ટના કુંડા અને સોફા પર સફેદ કવર જેવા ઉપાયોથી વાતાવરણ ઠંડુ રહી શકે

ઉનાળાનું આગમન થઈ રહ્યું છે ત્યારે ટીવી પર આવતી એક જાહેરાતે બધાનું ધ્યાન ખેચ્યું છે. એક પરિવાર ઘરની બહાર દીવાલો પર પાણી છાંટીને ઘરને ઠંડું કરવાની કોશિશ કરે છે. જ્યારે બાજુના ઘરનો માલિક ઘરને ઠંડું રાખવા વેધરશિલ્ડ સન રિફ્લેકટર પેઇન્ટ કરાવે છે. વાસ્તવમાં આ પેઇન્ટ સનરફિલેકટ ટેક્નોલોજી પર કામ કરે છે એટલે કે તેમાં સોલર રફિલેકટ ઇન્ડેકસ વધારે હોય છે. આ પેઇન્ટમાં ટાઇટેનિયમ ડાયોક્સાઇડ અને કો-પોલિમર કમ્પાઉન્ડને કારણે ઘરની અંદરના તાપમાનને પ ડિગ્રી સુધી ઓછું કરી શકાય છે.

ઘરની છતમાં દેશી નિળયા નાખવામાં આવે તો ગરમી સીધી ઘરમાં પ્રવેશ કરતી નથી. તેમ જણાવતા સિવિલ એન્જિનિયર હિતેશભાઇ પટેલે જણાવ્યું કે, દાયકાઓ અગાઉ મકાનોની બાંધણી એવી રહેતી કે ગરમીના દિવસોમાં પણ ઘરના અંંદરનું તાપમાન ઠંડું રહેતું. મકાનની દીવાલો જાડી હોય તો ઘરની અંંદર આવતી ગરમીને ઘટાડી શકાય છે. જ્યારે સાલ એન્જિનિરિંગના ડાયરેકટર રૂપેશ વસાણીએ જણાવ્યું કે, ઘરની સામે બગીચો બનાવવા કરતા પ્લોટની વચ્ચે મકાન બનાવીને ચારે તરફ ખૂલ્લી જગ્યા રાખવાથી હવાની અવરજવર વધારે સારી રીતે થાય છે. તે ઉપરાંત ઘરની ચારે તરફ નાના છોડ ઉછેરવાથી પણ ઠંડક મેળવી શકાય છે. ઘરના ખૂણામાં ઇનડોર પ્લાન્ટના નાના નાના કુંડા ઓરડામાંથી ગરમી શોષી લેશે.

ક્રોસ વેન્ટિલેશન શ્રેષ્ઠ ઉપાય -

પરંપરાગત ઘરમાં બે દરવાજા બનાવવા પાછળનો મુખ્ય હેતુ હવાની અવરજવરનો રહેતો હતો. આધુનિક ભાષામાં આપણે આ સિસ્ટમને ક્રોસ વેન્ટિલેશન કહીએ છીએ. તેમ જણાવતા સૃષ્ટિ એનજીઓના સેક્રેટરી રમેશભાઇ પટેલે કહ્યું કે, જો ઘરમાં હવાની અવરજવર યોગ્ય રીતે થતી રહે તો ગરમીનો અહેસાસ દૂર રહે છે. પ્લાસ્ટિક પેઇન્ટના કારણે ઘરની સુંદરતામાં વધારો થાય છે, પરંતુ તેના લીધે રૂમ ગરમ રહે છે. પ્લાસ્ટિક પેઇન્ટની જગ્યાએ ઘરમાં ચૂનો કરવામાં આવે તો ગરમીમાં ઘટાડો થાય છે. ફર્શ માટે અનેક પ્રકારની ટાઇલ્સ મળે છે પરંતુ ઘરને ઠંડું રાખવા ઇંટ કે સિમેન્ટની ટાઈલ્સ શ્રેષ્ઠ છે. તે ઉપરાંત ઘરમાં સોફા ઉપર સફેદ કવર ચડાવો. જો કે પરંપરાગત ભારતીય બેઠક આદર્શ ગણાય. છથી આંઠ ઇંચ પ્લેટફોર્મ પર ગાદી-તકિયા ગોઠવીને સોફાના ડનલોપની ગરમીથી બચવાનો ઉપાય શોધી શકાય. તેવી રીતે હળવા રંગના કોટનના પડદા લગાવી ગરમીને દૂર રાખી શકાય. આ ઉપરાંત બારીમાં એસીની જગ્યાએ ખસની સાદડી લગાવવાથી રૂમમાં તાપમાન ઠંડું રહે છે.