અનુભવ જ નક્કી કરે છે પરિણામ

 

અનુભવ શબ્દ આપણી જાણકારીને સમૃદ્ધ બનાવે છે. અનુભવ વિના કંઇ મેળવવાની આશા રાખવી એ અંધારામાં તીર મારવા સમાન છે.

સૂર્યની ગરમીનો અનુભવ તડકામાં ગયા વિના કરવાનું અશક્ય છે. આ અનુભવની પાઠશાળા છે. જીવનમાં થતાં જુદા જુદા પરિવર્તન આપણને ઘણુંબધું શીખવે છે. અનુભવ કર્યા વિના કોઇ વસ્તુ, સંબંધ કે વિચારને સમજી શકાતા નથી. અનુભવ જ પરિણામ નક્કી કરે છે. થોડો ફેરફાર સારું કરવાની અને વિખેરી નાખવાની શક્તિ ધરાવે છે. પરિવાર માટે નવવધૂ કેવી છે, તે તો થોડા દિવસ સાથે રહીને, વાતચીત કરવાના અનુભવ પછી જ ખબર પડે છે. માત્ર એને જોવાથી આ બાબતનું અનુમાન બાંધી શકાતું નથી. આપણા અનુભવોની યાદીની સાથોસાથ જાણકારીની યાદી પણ લાંબી થતી જાય છે. તેને એક તક આપવામાં અચકાવ નહીં, કેમ કે દરેક અનુભવ આપણને મક્કમ બનાવે છે.

પરિવર્તન પછી જ અનુભવ મળે છે. એકધારી પસાર થતી બાબતોમાં નથી નવીનતા હોતી કે નથી હોતી અનુભવ મળવાની શક્યતા. પરિવર્તનનું એક ઉદાહરણ દરેક ઘરમાં જોવા મળે છે. એક મહિલાના સ્વરૂપે. એક ગૃહિણી થોડા થોડા સમયે ઘરમાં કંઇ ને કંઇ ફેરફાર કરતી રહે છે. ફર્નિચરથી લઇને ઘરમાં ગોઠવેલા કૂંડાં, સજાવટ વગેરે. આવા નાનાં નાનાં પરિવર્તનથી એ પોતે તો અનુભવનો આનંદ માણે જ છે. એટલું જ નહીં, પરિવારના અન્ય સભ્યોને પણ નવીનતાનો અનુભવ કરાવે છે. ક્યાંકથી વાંચીને કે કોઇની પાસે સાંભળીને એ રસોઇમાં નવા નવા પ્રયોગ કરે છે. પરિણામે ક્યારેક સારા તો ક્યારેક ખરાબ સ્વાદનો અનુભવ કરે છે. આ અનુભવ જીવનને નીરસ બનતાં અટકાવે છે.

પરિવર્તન સાથે સંકળાયેલી નવીનતા અને નવીનતા સાથે સંકળાયેલ અનુભવ. રોજિંદા જીવનમાં એક વધુ અનુભવ જિંદગીમાંથી કંટાળાને દૂર કરી દે છે. જ્યારે કંટાળો દૂર થઇ જશે, તો જીવન વહેતા પ્રવાહ સમાન તાજગીભર્યું રહેશે, કાયમ.