હરતીફરતી ઓફીસ જેવી ઓડી A-૬નું સૌપ્રથમ સુરતથી લોન્ચિંગ

 

- સુરતમાં ૪ મહિનામાં ૧૦૦ કારના વેચાણનો લક્ષ્યાંક
- લક્ઝુરિયસ સેગમેન્ટમાં લીડર બનવાની મહેચ્છા

શહેરમાં ગુરુવારે ઓડી કારનો શો રૂમ ખુલ્લો મૂકવામાં આવ્યો હતો. આ પ્રસંગે ગુજરાતમાં પહેલીવાર ઓડીની એ- ૬ કારનું લોન્ચિંગ કરવામાં આવ્યું હતું. એ-૬ કારની કિંમત ૩૭.૭ લાખ (એક્સ શો-રૂમ) રાખવામાં આવી છે.

જર્મન લકઝરી કાર ઉત્પાદક ઓડીએ સુરતમાં વિશ્વ કક્ષાનો શો રૂમનું ઓડી ઇન્ડિયાના હેડ માઇકલ પર્શકના હસ્તે કરવામાં આવ્યું હતું. દિવ્ય ભાસ્કર સાથેની ખાસ મુલાકાતમાં માઇકલે કહ્યું હતું કે, અમદાવાદમાં ઓડીનો શો રૂમ છે, જ્યાં ૨૨ ટકા કાર તો સુરતથી ખરીદાતી હતી. સુરત એવું શહેર છે જ્યાં લકઝુરિયસ વસ્તુ ખરીદનારા અને સમજનારા લોકો છે. એટલે અમે શો રૂમ શરૂ કર્યો છે. ડિસેમ્બર-૨૦૧૧ સુધીમાં સુરતમાં ૧૦૦ કાર વેચવાનો અમારો અંદાજ છે. ઓડીની એ-૬ આમ તો ૪૩ વર્ષથી છે પણ જનરેશન પ્રમાણે તેમાં વારંવાર ફેરફાર કરાયા છે.

માઇકલે કહ્યું હતું કે ભારતમાં અત્યારે લકઝુરિયસ કારનું માર્કેટ ૦.૭ ટકા જેટલું છે, જે આ વર્ષે ૧ ટકા પર પહોંચવાની શક્યતા છે. ઓડી યુરોપ અને ચીનમાં લકઝુરિયસ કારના સેગમેન્ટમાં લીડર છે પણ ભારતમાં અમે આ સ્થાને ૨૦૧પમાં પહોંચીશું.

એ-૬ની વિશેષતા શું છે...

ઓડી એ-૬ એટલે કે જાણે હરતીફરતી ઓફિસ. નવી એ-૬ એ એ-૮ની આધુનિક ટેક્નોલોજી અને નવી ઓડી એ-૭ સ્પોર્ટબેકની ડિઝાઈનનું મિશ્રણ છે. હળવા વજનની ટેક્નોલોજી,એડેપિ્ટવ એર સસ્પેન્શન, એલઇડી હેડ લેમ્પસની સુવિધા રાખવામાં આવી છે.