સ્કિલ ઈન્ડિયા હેઠળ દેશભરમાં 700થી વધુ સ્થળોએ એક દિવસીય એપ્રેન્ટિસ મેળા યોજાયા

 

સ્કિલ ઈન્ડિયા હેઠળ દેશભરમાં 700થી વધુ સ્થળોએ એક દિવસીય એપ્રેન્ટિસ મેળા યોજવામાં આવ્યા છે. તે દ્વારા એક લાખથી વધુ એપ્રેન્ટિસની ભરતી કરીને તેમને તાલીમ આપવામાં આવશે. ઉદ્યોગ સાહસિકતા મંત્રી ધર્મેન્દ્ર પ્રધાને આજે નવી દિલ્હીમાં એક કાર્યક્રમમાં આ એપ્રેન્ટિસ મેળાની શરૂઆત કરી. તેમણે કહ્યું કે આ ઝુંબેશ દેશના યુવાનોને સશક્ત બનાવશે. આ એપ્રેન્ટિસશિપ પ્રોગ્રામ દ્વારા લોકો રોજગારી ઉભી કરશે, અને યુવાનોમાં આત્મવિશ્વાસના સ્તરને વધારશે.

 

આ મેળામાં ઊર્જા, છૂટક બજાર, ટેલિકોમ, IT, ઇલેક્ટ્રોનિક્સ, ઓટોમોબાઈલ અને અન્ય 30 થી વધુ ક્ષેત્રોમાં કાર્યરત ચાર હજારથી વધુ સંસ્થાઓ જોડાઈ છે. આ ઉપરાંત, યુવાનોને વેલ્ડર, ઇલેક્ટ્રિશિયન, હાઉસ કીપર, બ્યુટિશિયન, મિકેનિક વગેરે 500 કરતાં વધુ ટ્રેડમાં જોડાવા તક મળશે.

 

કૌશલ્ય વિકાસ અને ઉદ્યોગ સાહસિકતાની રાષ્ટ્રીય નીતિ, 2015 હેઠળ કુશળ કર્મચારીઓને રોજગાર પ્રદાન કરવાનો આશય છે. ધોરણ 12 પાસ કે સ્નાતક કે ધોરણ 5 પાસ તથા કૌશલ્ય તાલીમ પ્રમાણપત્ર ધારકો, ITI, કે ડિપ્લોમા ધારકો આ એપ્રેન્ટિસ મેળામાં જોડાયા છે. ઉમેદવારોએ બાયોડેટાની ત્રણ નકલો, તમામ માર્કશીટ અને પ્રમાણપત્રોની ત્રણ નકલો, ફોટો આઈડી, અને પાસપોર્ટ સાઇઝના ત્રણ ફોટા સાથે અરજી આપવાની રહેશે.