ઓછી મહેનતે પોતાનું કામ પાર પાડવાની ટિપ્સ

 

 

‘હાઉ ટુ ગેટ થિંગ્ઝ ડન’ રિચર્ડ ટેમ્પલર દ્વારા લખાયેલા પુસ્તકમાં ઓછી મહેનતે પોતાનું કામ પાર પાડવાની ટિપ્સ અપાઇ છે. ઘણા લોકો સરળતાથી પોતાનું કામ કરાવી શકે છે. એવી કઇ આદતો કે ખાસિયતો છે જે દરેક ક્ષેત્રમાં સફળતા અપાવે છે. તે આ પુસ્તકનો મુખ્ય વિષય છે. કોઇ પણ ક્ષેત્રમાં સફળ થવા માટે વ્યવસ્થિત હોવું જરૂરી છે. વ્યવસ્થા એક એવી શિસ્ત છે જેનો અમલ કરનાર માટે એ આદત બની જાય છે. અવ્યવસ્થિત લોકો સમયના અભાવને દોષ દેતા હોય છે પણ સફળતા માટે સમયને મેનેજ કરવો પડે છે.

મહત્વનાં કામ જુદાં પાડી તેમના પર ધ્યાન આપવું જરૂરી છે. મહત્વનાં કામોની સમય સીમા નક્કી કરવાથી સરળતા રહે છે. કાગળોનું વ્યવસ્થિત ફાઇલિંગ થયું હોય તો ખરા સમયે સહેલાઇથી મળી શકે છે અને ખોટું ટેન્શન ટાળી શકાય છે. લોકોની વર્તણૂંક કે સ્વભાવ બદલાતા નથી માટે એની પરવા કર્યા વિના પોતાનાં કામ પર ધ્યાન કેન્દ્રિત કરો. દરેક કામ યાદ રાખવું શક્ય નથી માટે એની લેખિત યાદી બનાવો. તે જ રીતે જેમને વધારે પ્રવાસ કરવો પડે છે તેમના માટે એક કાયમી પેકિંગ લિસ્ટ મદદરૂપ થાય છે.

એક સ્થળનું કામ સાથે કરો જેથી બેવાર જવું ન પડે. એક સમયે એકથી વધારે કામ કરી શકાય છે. જેમ કે પ્રવાસમાં અગત્યનું વાંચન થઇ શકે. આપણે ઘણો સમય નકામી પ્રવૃત્તિમાં વેડફતા હોઇએ છીએ. એની એક યાદી જરૂરી છે જેથી એવા સમયનો સદુપયોગ થઇ શકે. ઘરમાં જેમ કચરો કાઢીએ છીએ તેવી રીતે ઓફિસમાં પણ નકામા કાગળોનો નિયમિત નિકાલ જરૂરી બની જાય છે.
જો ટેબલ પર નકામા કાગળોનો ઢગલો હશે તો મહત્વના ખરા સમયે નહીં મળે. કાર્યક્ષેત્રમાં અમુક ઘટનાઓનો સમય નક્કી હોય છે. છેલ્લી ઘડીએ એમાં વ્યસ્ત થવા કરતાં એમની પૂર્વતૈયારી જરૂરી છે. વસ્તુ જ્યાંથી લીધી હોય ત્યાં મૂકવાનો આગ્રહ બાળપણથી શીખીએ તો એક આદત બની જાય છે અને વસ્તુઓ ખોવાતી નથી.
દરેક કામ જાતે કરવાનો દુરાગ્રહ છોડી કામ વહેંચવાની આદત કેળવો. નહીંતર કામનો ભરાવો થાય છે અને બિનઅગત્યનાં કામોમાં સમય વેડફાય છે. ઝડપી વાંચન સમય બચાવે છે. મિટિંગમાં પણ દરેક મુદ્દા માટે ચર્ચાની સમયમર્યાદા રાખવી જરૂરી છે. નિર્ણય વિશે ચિંતન કરવા કરતાં નિર્ણય લેવો વધારે મહત્વનું છે. અમુક લોકો નિયમિત રીતે દરેક કામમાં મોડા પડતા હોય છે જ્યારે અમુક શિસ્તબદ્ધ રીતે દરેક કામ સમયસર કરે છે. આ બંને આદતો છે જેને આપણે પોતે કેળવવી પડે છે.