NIDની આ શોધ અમદાવાદીઓની આદત બદલી નાખશે!

- અમદાવાદીઓ હવે રિક્ષાવાળાઓ સાથે ભાડાં અંગેની દલીલ નહીં કરી શકે
- રીક્ષાવાળા પણ આ શોધ પછી મુસાફરોને છેતરી નહીં શકે
- જીપીએસ આધારિત આ સાધન મુસાફર અને રિક્ષાચાલકોને ઉપયોગી સાબિત થશે

અમદાવાદસ્થિત વિશ્વસ્તરની એકમાત્ર સંસ્થા નેશનલ ઇન્સ્ટિટ્યૂટ ઓફ ડિઝાઇન (NID)ની એક છાત્રાએ કરેલી શોધને કારણે અમદાવાદીઓની એક આદત સમૂળગી બદલાઇ શકે તેમ છે. NIDની છાત્રા પલક ગુપ્તાએ જીપીએસ આધારિત એવું સાધન બનાવ્યું છે કે જે સ્થળનું અંતર બતાવવાની સાથે ત્યાં સુધીનું ભાડું પણ દર્શાવી શકે તેમ છે. પલકે આ સાધન અમદાવાદના રિક્ષાચાલકોને ધ્યાનમાં રાખીને તૈયાર કર્યું છે.

મોટાભાગે અમદાવાદીઓ અને અમદાવાદમાં આવનારા બહારના લોકોને રિક્ષાચાલકોનો યાદગાર અનુભવ થાય છે. તેમાં પણ અમદાવાદીઓ અને રિક્ષાચાલક વચ્ચે ભાડાં બાબતે થતી તકરાર એ સામાન્ય બાબત બની ગઇ છે. કેટલાક શહેરજનોને તો રિક્ષાભાડાં અંગે દલીલ કરીને જ ભાડું આપવું ગમે છે.

જો પલક ગુપ્તાએ તૈયાર કરેલું રિક્ષાભાડું બતાવતું આ સાધન રિક્ષામાં ફિટ કરી દેવામાં આવે તો જે સ્થળે જવું હોય તે સ્થળનું અંતર અને ભાડું પણ તે દર્શાવી છે. આ સાધનના ઉપયોગને કારણે રિક્ષાચાલકો મુસાફરો પાસેથી વધુ ભાડું તો નહીં જ વસૂલી શકે પણ સાથે સાથે અમદાવાદીઓ પણ રિક્ષાવાળાઓ સાથે ભાડાંની બાબતે દલીલ કે તકરાર નહીં કરી શકે.

આ અંગે પલકે જણાવ્યું હતું કે, અમદાવાદ શહેરમાં રિક્ષાવાળાઓ અને મુસાફરો વચ્ચે દરરોજ થતી તકરારો જોઇને તથા તેને પોતાને થયેલા કેટલાક અનુભવના આધારે તેણે આ પ્રકારનું સાધન બનાવવાનો વિચાર આવ્યો હતો.