તમારી કાર વધેલા ખોરાકમાંથી બનાવાયેલા ઓઇલથી દોડશે

 

ફાસ્ટ ફૂડને નવો અર્થ આપતા હોય તેમ વિજ્ઞાનીઓએ પેસ્ટી, ક્રિસ્પ અને અન્ય ફૂડ વેસ્ટમાંથી ઓઇલ કાઢવાની અને તેને ઇકો-ફ્રેન્ડલી બળતણમાં ફેરવવાની રીત શોધી કાઢી છે.

બળતણ પૂરું પાડતી બ્રિટિશ કંપની ગ્રીનર્જી ઇન્ટરનેશનલે જાહેરાત કરી છે કે તેણે વધેલા ખોરાકમાંથી કૂકિંગ ઓઇલ કાઢવાની અને તેને ડીઝલ સાથે મિક્સ કરીને પર્યાવરણને નુકસાન ન પહોંચાડે તેવું બળતણ બનાવવાની નવી ટેક્નોલોજી વિકસાવી છે. વાર્ષિક ૧૦ અબજ લિટર બાયોડીઝલ અને ડીઝલનું ઉત્પાદન કરતી કંપની અનુસાર તેણે વપરાયેલા ખાદ્યતેલને પ્રોસેસ કરવા માટે લિંકનશાયર ખાતેની તેની ઉત્પાદન સુવિધામાં ૫૦ મિલિયન પાઉન્ડનું રોકાણ કર્યું છે.

કંપનીએ દાવો કર્યો છે કે ગ્રીન ફ્યુઅલ ટૂંક સમયમાં બ્રિટનના પેટ્રોલ સ્ટેશનોએ વેચવા માટે તૈયાર હશે. તેણે જણાવ્યું હતું કે તે બ્રોકલ્સબી લિમિટેડ નામની કંપની સાથે કામ કરી રહી છે જેણે વધેલા ખોરાકમાંથી તેલ કાઢવાની પદ્ધતિ વિકસાવી છે. ગ્રીનર્જી પછી તેલને વધુ શુદ્ધ કરે છે અને તેને બાયોડીઝલમાં ફેરવે છે.