વડાપ્રધાન સારા વ્યક્તિ પણ સોનિયા સમસ્યા ઊભી કરે છે

ભ્રષ્ટાચાર વિરોધી ઝુંબેશ ચલાવી રહેલા અણ્ણા હજારેએ શનિવારે કોંગ્રેસના પ્રમુખ સોનિયા ગાંધીને દેખીતી રીતે જ નિશાન બનાવ્યા હતા અને કહ્યું હતું કે ‘રિમોટ કંટ્રોલ’ જ ‘સમસ્યાઓ’ ઊભી કરી રહ્યું છે. જોકે તેમણે વડાપ્રધાન મનમોહનસિંઘની પ્રશંસા કરી હતી અને કહ્યું હતું કે તેઓ ‘સારા વ્યક્તિ’ છે.

અણ્ણા હજારેએ અહીં એક જાહેર સભાને સંબોધન કરતી વખતે કોંગ્રેસ પ્રમુખ સોનિયાનું નામ લીધા વિના પણ તેમના દેખીતા સંદર્ભમાં કહ્યું હતું કે ‘વડાપ્રધાન સારા વ્યક્તિ છે. વડાપ્રધાન ખરાબ નથી. સમસ્યા તો રિમોટ કંટ્રોલને કારણે સર્જાય છે.’

અણ્ણાએ વધુમાં કહ્યું કે ‘હવે આપણને બધાને વિશ્વાસ છે કે દરેક સરકારમાં લોકોની સત્તા સૌથી મજબૂત છે.’ તેમણે કહ્યું કે જો ૧૬ ઓગસ્ટ સુધીમાં લોકપાલ બિલ અમલમાં નહીં આવે તો તેઓ ફરી જંતર મંતર ખાતે જઈને આમરણાંત ઉપવાસ શરૂ કરી દેશે. તેમણે કર્ણાટકના લોકોને પણ જો લોકપાલ બિલ અમલી ન બને તો જેલભરો આંદોલન કરવા અપીલ કરી હતી.