ચાની ચુસ્કી થશે મોંઘી, કીલો દીઠ રૂ 75 વધુ આપવા પડશે

 

ચા નું ઉત્પાદન ઓછુ થતાં આ વર્ષે ભાવમાં ભડકો થશે. એટલું જ નહીં, આવતા ત્રણ મહિનાથી ચાના ભાવમાં કિલોએ ૫૦થી ૭૫નો વધારો થવાની શક્યતા છે. જુનો ભાવનો સ્ટોક ખતમ થવાની સાથે જ દેશભરના વેપારીઓ ચાની કિંમતમાં વધારો કરશે.

ભારતના ચા પકવતા ઉત્તર પુર્વીય રાજ્યોમાં આ વર્ષે ખરાબ વાતાવરણના કારણે ચા ના ઉત્પાદનમાં ઘટાડો થયો છે, જ્યારે ચાની માંગમાં દર વર્ષે વધારો થઈ રહ્યો છે તે જોતા અમદાવાદના ચા ના હોલસેલર્સ ચાલુ વર્ષે ચાના ભાવમાં ભડકો થવાની શક્યતા જોઈ રહ્યાં છે.

અમદાવાદ ટી એસોસિએશનના વેપારીઓના કહેવા મુજબ પ્રાથમિક રીતે કિલોએ ૫૦થી ૭૫ રૂપિયાનો વધારો થશે તેવું માનવામાં આવે છે પરંતુ આનાથી વધારે પણ ભાવ વધી શકે છે. અમદાવાદની જેમ ભારત ભરના તમામ  વેપારી સંગઠનોએ ચાના ભાવ વધારની પ્લાનિંગ કરી લીધી છે. આસામમાં જે સૌથી સારી કવોલીટીની ચા ગણવામાં આવે છે તેની હરાજીમાં ફેબ્રુઆરીમાં કિલોએ ૬૦થી ૮૦ રૂપિયા વધુ ભાવ ગયા વર્ષની સરખામણીએ આવ્યો છે. ઉત્તર પુર્વના રાજ્યોમાં સુકા વાતાવરણના કારણે ઉત્પાદનમાં ઘટાડો થયો છે. જાન્યુઆરી અને ફેબ્રુઆરીમાં ઉત્પાદનમાં ૩૦ ટકાનો ઘટાડો થયો છે, આ ઉપરાંત ગયા વર્ષનો કોઈ સ્ટોક નથી તેથી ભાવો વધી રહ્યાં છે. ગયા વર્ષે ૯૮૮ મીલીયન કિલો ચાનું ઉત્પાદન થયું હતું, જે તેના આગલા વર્ષની સરખામણીએ ૨.૩ ટકા વધારે હતું પરંતુ તેની સામે માંગમાં ૩.૫ ટકાનો વધારો થયો છે. આ વર્ષે ઉત્પાદન ઓછું છે અને માંગ વધારે છે.